Home Religion y Espiritualidad Imagen “Señora di tur Pueblo” na Aruba

Imagen “Señora di tur Pueblo” na Aruba

41
0
SHARE
- Advertisement -

ORANJESTAD (AAN): Tur aña ta tuma lugar na diferente parti di mundo un dia di oracion na honor di e Señora di tur Pueblo. E dianan mariano aki tin nan origen den e aparicionnan di Mama Maria den añanan 1945 te 1959 na Amsterdam na un hende muhe senciyo di nomber Ida Peerdeman. Birgen Maria a revela na Ida cu e kier ta conoci y stima pa tur hende como “e Señora di tur Pueblo” of “e Mama di tur Pueblo”. Den su mensahenan e Señora di tur Pueblo ta revela e plan, cu cual Dios kier salba mundo pa medio di Su Mama. Pa enfatisa esaki Maria ta duna tur pueblo y nacion un oracion y un imagen.

E imagen ta representa e Señora di tur Pueblo, ilumina pa e luz radiante di Dios, para riba e globo dilanti di e cruz di su Yiu, E Salbador, cu Kende e ta inseparablemente uni. For di mannan di Maria ta sali tres rayo di Gracia, Salbacion y Paz, cu Maria por parti na tur esnan cu ta pidi’e pa e ta nan Abogado. E trupa di carne ta representa e pueblonan di mundo, cu lo no haya trankilidad te ora cu nan hisa nan cara mira e Cruz, e centro di mundo.

E Señora di tur Pueblo a dicta un oracion cortico y poderoso pa preserva nos di degeneracion, desaster y guera. “Boso, pueblonan di e tempo aki, sa cu boso ta bou di proteccion di e Señora di tur Pueblo. Invoc’e como boso Abogado, pidi’e pa desvia tur desaster. Pidi’e pa deporta e degeneracion for di e mundo aki. Ta for di degeneracion ta bini desaster. Ta for di degeneracion ta bini guera. Pa medio di mi oracion boso lo pidi pa desvia esaki for di mundo. Boso no sa con grandi y con importante e oracion aki ta cerca Dios.” (mensahe di dia 31 di mei 1955)

Despues di a consulta cu e Congregacion di Doctrina di Fe na Vaticano; mgr. Bomers cu e tempo ey tabata e Obispo di Haarlem-Amsterdam, hunto cu su Obispo auxiliar mgr. Punt a duna permiso na aña 1996 pa e veneracion publicamente di Santa Birgen Maria bou di e titulo: “e Señora di tur Pueblo”.  Na aña 2002 e obispo actual di Haarlem-Amsterdam, mgr. Punt a skirbi cu e ta convenci di e origen sobrenatural di e aparicionnan.

En conexion cu e accion mundial di e Señora di tur Pueblo lo bay tuma lugar un dia di oracion dia 8 di september proximo na misa Inmaculada Concepcion na Santa Cruz. Como preparacion pa e dia grandi aki lo bay tin un nobena cu ta cuminsa dia 30 di augustus te cu dia 7 di september na e diferente parokianan di Aruba.

Henter pueblo di Aruba ta keda cordialmente invita pa asisti na e nobena y e Dia di Oracion na honor di e Señora di tur Pueblo. Laga nos tur bini hunto rond di su imagen pa resa pa paz den nos curason, den nos famia, pa paz na Aruba y pa henter mundo. Asina nos ta cumpli cu un deseo di e Mama di Dios cu ta bisa den su mensahenan: “Lo bo percura pa cada aña e pueblonan lo reuni rond di e imagen aki. Esaki ta e regalo grandi cu Maria, e Señora, e Mama di tur Pueblo kier ofrece na tur pueblo di mundo”. (31 di mei 1955)

Den e dianan cu ta bini lo trece mas informacion di e dianan di nobena den e parokianan y como tambe di e Dia di Oracion.

 

- Advertisement -

DUNA COMENTARIO

Please enter your comment!
Please enter your name here