Home Gobierno Instituto “Futura Lab” trahando e brug entre e diferente sectornan di comunidad

Instituto “Futura Lab” trahando e brug entre e diferente sectornan di comunidad

55
0
SHARE
- Advertisement -

Gobierno riba caminda di innovacion:

ORANJESTAD (AAN) – Minister Presidente sra. Evelyn Wever-Croes a elabora tocante e tema di innovacion, den conferencia di prensa di gobierno, diahuebs mainta.

Un di e puntonan importante di gobierno ta enfatiza riba innovacion y pa esaki a lanta loke nan ta yama e “Futura Lab” cu ta bay encarga cu e desaroyo aki.

Futura Lab ta un instituto di innovacion y tin cu forma e brug entre gobierno cu sector priva, sector civico, publico y academico pa hunto yega na impulsa innovacion den henter nos comunidad.

Gobierno ta trahando riba un plan di innovacion nacional, y esaki ta un di e tareanan cu nan tin tambe pa pone e ser humano central.

E mandatario a duna di conoce cu durante e ultimo lunanan tabata tin diferente tayer di trabao, proyecto, reunion y pa prome biaha a organiza un “innovation summit” na Aruba. Kiermen, un cumbre di innovacion unda sector publico y priva a bin hunto pa defini cual ta e direccion cu Aruba mester bay cu innovacion.

E dignatario a expresa cu na momento desde cu MEP a drenta den gobierno, a constata cu tin un gap grandi den innovacion den nos Isla. Aunke algun instancia a adelanta riba e tema aki, e gap den innovacion ta gigantesco specialmente den gobierno.

“Por a ripara cu no tabata existi un maneho, ni un vision tocante den ki direccion nan kier bay, y ora no tin maneho ni vision pa loke ta trata tecnologia cu ta avanza asina lihe, bo ta cay atras hopi lihe”, Minister Presidente a expresa.

E mandatario a señala cu nos economia y economianan rond mundo tin cu wordo impulsa pa innovacion rond mundo, y awendia no por exclui innovacion di economia y esaki ta crucial pa Aruba tambe.

“Mundo ta cambiando hopi lihe. Hopi di e muchanan cu awe ta cuminzando scol lo bay traha den trabaonan cu awor no ta ni existi. E pregunta ta si nos ta preparando nan pa e trabaonan aki. Pesey innovacion ta asina importante, y e unico forma cu nos pais crece y sigui progresa ta atravez di innovacion”, e mandatario a expresa.

Gobierno a tuma algun paso cu ya caba ta avanzando riba esey, y un di nan cu ta tumando hopi na serio ta E-Government, pa gobierno bay mas over digitalizacion. Den e cuadro aki, e mandatario a señala, e por a presencia un proyecto hopi interesante entre Censo y Departamento di Recurso Humano. Esaki ta un proyecto di automatizacion unda cu DRH ta haya tur informacion cu mester di e empleadonan publico, automaticamente for di Censo locual ta simplifica e trabao.

Tambe gobierno ta haciendo un investigacion digital pa mira unda cada departamento di gobierno ta, y realmente cual ta e gap enorme cu mester di hopi atencion.

 

- Advertisement -

DUNA COMENTARIO

Please enter your comment!
Please enter your name here