Home Parlamento Jet priva pa Al Gore, 51 miyon den consultancy pa companianan di...

Jet priva pa Al Gore, 51 miyon den consultancy pa companianan di utilidad y miyones cobra pa Richard Arends

2353
0
SHARE
- Advertisement -

Edgar Vrolijk a pidi splicacion:

ORANJESTAD  (AAN): Dialuna mainta un biaha mas a tuma lugar un conferencia di prensa di partido MEP, unda cu parlamentario Edgar Vrolijk a papia riba e NV-nan Aruba esta Utilities, Elmar y WEB.

E parlamentario a trece dilanti cu fraccion di MEP a hasi diferente pregunta na e companianan aki y porfin nan a haya contestanan, cu ta pone cu nan ta bay sigui busca pa haya mas informacion.

“E contestanan a hasi nos mas caweta y mas interesa pa sa con e proceduranan aki a bay”.

“Naturalmente nos tin cu trece claridad pa pueblo por compronde ta con cos a bay di 2009 pa 2017 den nos NV-nan”, segun Vrolijk.

El a sigui bisa cu hopi biaha e ex gobernantenan di AVP  a bisa cu nan no a uza e placa di dividendonan, pero den otro forma si nan a strika for di eyden.

Vrolijk a splica cu gobierno di AVP a bin cu un vision “Green” unda cu lo crea 1.600 cupo di trabao, pero esaki no a sosode.

“Esaki tabata un farsa pa acomoda amigonan pa bira miyonario riba custia di pueblo”.

“Lamentablemente pueblo a vota pa nan atrobe na 2013, sin sa kico nan tabata hasi cu placa di pueblo”.

“Nos pueblo mester puntra ex Prome Minister Mike Eman cu ta biba den un penthouse, con e por biba den algo asina”.

Esaki segun e parlamentario di e fraccion geel, kende a cita un articulo cu a Sali den DIARIO, unda cu sindicato ALVAST di Elmar a papia di un compania ACE Engineering cu tabata hasi negoshi di mas di 15 mil florin pa luna riba cabez di empleadonan, pa beneficia amigonan.

Tambe el a menciona un compania yama Activated Power, cu tambe a wordo menciona den e articulo di DIARIO.

Utilities a contesta e preguntanan di Vrolijk, unda cu segun e parlamentario tabata interesante pa wak con ACE Engineering tambe a wordo considera como un compania di duna conseho (consultancy) y a strika 2.2 miyon florin den un tempo cortico, despues cu el a wordo lanta na 2013.

Segun Vrolijk, Activated Power ta di e mesun trahadornan di Elmar cu tin tambe e compania ACE Engineering.

“Esaki tabata e manera con tabata strika placa den e NV-nan di Aruba, durante di gobernacion di AVP”.

Vrolijk a hasi preguntanan tambe pa haya sa entre otro ta ken a haya e trabao pa organiza e Green Conference, mirando cu Elmar, Utilities y WEB a sponsor e Green Conference di 2013 pa 2017 cu 975 mil florin.

El a sigui bisa cu e mesun companianan a sponsor un otro conferencia esta “Europe Meets America” cu 300 mil florin.

“Un total di 1.275.000 florin a wordo gasta riba e conferencianan aki, sin crea 1 cupo di trabao pa pueblo”.

“Mas interesante ta, pa wak na ken Utilities a paga pa consultancy”.

Esaki segun Vrolijk, kende a indica cu un di e companianan cu mas a strika placa, esta 574 mil florin, ta un compania yama Horizon Consultancy N.V, di cual Richard Arends tabata director di 2008 te cu 2016.

El a baha como director na December 2016, ora cu el a bira minister di Finanzas di AVP.

Pa colmo Arends tabata consehero di Mike Eman di 2009 te cu 2014, pa cual el a wordo paga alrededor di 660.000 florin.

“En total Arends a cobra 1.1 miyon di placa di pueblo, sin conta e 574 mil florin cu el a strika caba”.

Esaki segun Vrolijk, kende a indica cu den su box el a haya e informacion cu Arends hunto cu Horizon tabata e organizadornan di Europe Meets America y e Green Conference.

El a indica cu awor tin cu bay hasi pregunta pa confirma esaki.

“Ora bo pone tur e placanan aki hunto, e meneer aki a strika casi 3 miyon florin di pueblo y awor e kier papia y hunga bunita”.

Vrolijk a bisa cue como maestro di school lo mester traha 63 aña pa strika e placa cu Arends a gana den menos cu 8 aña.

El a sigui bisa cu ta pa e motibonan aki Mike Eman y AVP no mester bin bek den Gobierno.

Vrolijk a papia tambe di e cantidad di orador cu a participa na entre otro e Green Conference cu mester a wordo bon paga.

Un di nan tabata ex candidato pa presidente di Merca Al Gore, kende a wordo paga 160 mil dollar pa papia un rato.

“Abo cu tin cu paga un cuenta di coriente pa nan no corta esaki por ehempel por a wordo subsidia di e placa cu nan a duna Gore”.

“Abo cu ta maestro y hunto cu bo alumnonan ta sofoca di calor den un klas sin airco, por a wordo yuda cu e placa aki pa pone airco den klas”.

Esaki segun Vrolijk, kende a indica cu un di exigencianan di Gore tabata cu e mester a bula den un jet priva.

E kier sa ta ken a paga pa esaki y pa e persona cu a bin cu Gore tambe.

E parlamentario di MEP a bisa tambe cu el a spanta pa wak e gastonan di consultancy di WEB, Elmar y Utilities di 2009 pa 2017.

WEB a gasta na consultancy 36.2 miyon florin, Elmar a gasta 10.4 miyon y Utilities 4.4 miyon florin.

Door di esaki Vrolijk a pidi pa haya e contratonan, pa wak pakico a paga tur e placa aki.

 

- Advertisement -

DUNA COMENTARIO

Please enter your comment!
Please enter your name here