Home Hudicial Kita persona cu ta sufri di atakenan mental for di trabou ta...

Kita persona cu ta sufri di atakenan mental for di trabou ta di mas

384
0
SHARE
- Advertisement -

Hues a dicta sentencia

ORANJESTAD (AAN) – Un persona, kende ta sufri di problemanan psychico, a gana su caso contra Calabas Hotels N.V., despues cu dicho hotel a kit’e di biaha for di trabou door cu el a keda algun dia sin bay traha.

Interesante den e caso aki ta cu Hues, despues di a evalua tur cos, ta haya cu enberdad e persona a haci malo di keda sin bay su dokter di cas pa notifica cu e ta malo, pero el a busca un persona pa reemplace. Hues ta haya cu teniendo tur circunstancia na cuenta, no ta motibo pa retiro di inmediato.

E persona, representa pa abogado mr. Figaroa a cuminsa un caso contra Calabas Hotels N.V., representa pa mr. Zeppenfeldt. E persona desde December 2010 ta trahando na Calabas Hotels N.V. Dia 5 December 2017 el a wordo kita di biaha. El a haya un telegram cu ta bisa: “Notifacion:-Abandono di trabou – Terminacion di contrato laboral. Mediante e presente telegram nos kier notifica cu bo persona no a presenta traha for di dia 27 November 2017 te cu awe 5 di December 2017. Nos no a ricibi ningun yamada ni hustificante di bo ausencia. Nos kier notifica bo persona di parti di human resources e terminacion di bo contrato laboral pa e motibo di abandono di trabou.”

Abogado mr. Figaroa a pidi Hues pa declara e retiro no admisibel y cu Calabas mester sigui paga e persona su salario. E abogado ta haya cu no tabatin motibo pa kita su cliente di inmediato.

Mr. Zepenfeldt a reacciona riba esaki y ta pidi Hues pa rechaza e demanda di e persona.

Hues den su evaluacion a mustra cu e persona ta reconoce cu el a keda sin bay traha. E persona a bisa cu e ta sufri di problema psychic y cu tambe e ta haya schizofreen o sea imagennan. Esaki segun e persona ta algo cu den su famia ta bin hopi dilanti. E persona a splica cu ora e haya e problema aki, e ta haya molester di halucinacion hunto cu hopi dolor di cabez. Desde 2007 e ta conoci cu e problema aki y ta sinti sintomanan di adelanta ora e ta bay haya e tipo di atakenan aki. Ora e persona sinti e sintomanan, e ta percura pa e tuma vacacion y si e no tin dianan di vacacion, e ta tuma dianan liber sin pago y ta percura pa un persona reemplace. E persona tin berguenza di su malesa y no kier pa su doño di trabou sa di esaki. Pesey mes e no a bay dokter di cas.

Riba 28 November 2017, e persona a sinti e sintomanan y el a dicidi di keda cas. Dia 29 November 2017 el a yama bisa cu e no lo bay traha y cu pa e tres dianan di su trabou, e lo laga un persona reemplace. Ta un persona cu e conoce, kende ta dispuesto pa yud’e. Esaki no a causa problema organisatorio na trabou na Calabas. Sinembargo e general manager kende tabata sa cu e persona un dia promer no a bay traha y a bis’e cu e mester percura pa haya un carta di dokter. Riba dianan 2 y 3 December 2017 e reemplasante a traha pa e persona. Esey tampoco no a causa problema organisatorio. Dia 4 December 2017 e persona a “whatsapp” su hefe pa papia cu e general manager pa e haya dianan liber sin pago pasobra e no ta sinti su mes bon. Esaki no a wordo duna. Dia 5 December 2017, e persona a wordo kita di biaha.

Hues ta mustra cu ta un hecho cu e persona a faya aki den keda sin bay su dokter. E persona ta bisa cu e no a haci esaki pasobra e tin berguensa pa e problema psychico cu e ta sufri di dje. Hues ta haya cu e consecuencianan di esaki ta cay pa cuenta di e persona.

Hues ta sigui mustra cu e persona no por a dicidi riba su mes cu e ta wordo reemplasa pa un persona. Esey ta algo organisatorio caminda ta e gerencia di Calabas mester dicidi. E hecho cu e reemplasante no a causa problema organisatorio, no ta kita afor cu esaki ta algo robez.

Na opinion di Hues, esey no kiermen cu gerencia di hotel ta bay tuma e medida mas pisa esta retiro. Esey no ta hustifica. Hues a mustra cu a base di documentonan cu e persona a presenta den Corte ta sali for di e punto di bista cu e tabata malo. Su ausencia no a causa problema organisatorio y cu el a busca un persona pa reemplace na trabou.

Hues a mustra cu ta un hecho cu e persona no a notifica corectamente cu e tabata malo pasobra e tabatin berguensa. Hues a tene na cuenta e edad di e persona cu e chens pa e haya un trabou na un otro lugar lo ta hopi minimo. Hues ta haya cu e retiro di biaha no ta hustifica.

Hues su decision ta cu e ta declara e retiro di inmediato no admisibel y cu Calabas lo mester paga e persona su salario.

 

- Advertisement -

DUNA COMENTARIO

Please enter your comment!
Please enter your name here