Home Deporte “Lefty” no ta give up y a pone como meta representa Aruba...

“Lefty” no ta give up y a pone como meta representa Aruba den e weganan paralimpics Tokyo 2020

357
0
SHARE
- Advertisement -

“Bo por tin bo dishabilidad, pero bo no mester laga esey stop bo”

ORANJESTAD  (AAN):  Elliott “Lefty” Loonstra ta un hoben di 28 aña cu ta train basta duro pa asina e por representa Aruba den e weganan paralimpico 2020 na Tokyo, Japon.

E ta train e deporte di Para-Taekwondo, disciplina cu  pa prome biaha ta wordo inclui den e weganan paralimpico.

Elliott a nace cu un discapacidad fisico. Su man drechi no ta completo, pero esaki no a stroba Elliot di haya e motivacion necesario pa durante su infancia y adolescencia participa den diferente deporte. Awo, como adulto e tin un meta su dilanti cual ta pa representa Aruba na Tokyo y banda di esey, motiba mas y mas persona pa practica un deporte.

Den entrevista cu DIARIO Lefty a duna di conoce cu su interes pa loke ta taekwondo cuminza na 2016 ora cu el a topa su trainer Luciano Mazzeo, kende  a puntre si e tabata interesa pa train cune.

Ora e tabata mucha,  a bisa, el a yega di train futbol, basketball, dive, entre otro y tambe taekwondo. Su interes a lanta atrobe pa loke ta taekwondo y poco poco el a inicia cu entrenamento te na yega na un nivel mas intensivo. Aworaki e tin casi 8 luna di training mas pisa cu e meta di yega na e pruebanan clasificatorio (2019) pa participa den e weganan na Tokyo.

El a laga sa cu den e clasificatorio tin 12 lugar pa e paralimpics y ta duna chens pa diferente pais por cay aden.

Lefty ta cay den e categoria di K-44, cu ta e personanan cu falta un man of tin un pida man, pero cu por haci un blocking ainda cu su man.

Te cu awo Lefty ta e unico persona cu ta preparando den e deporte aki na Aruba. Su deseo ta pa tin mas persona interesa. “Nos ta buscando mas hende cu por join nos y lanta e interes pa e deporte aki tambe”, el a expresa.

CAMBIO DI ACTITUD

“Mi ta haya cu e deporte aki a yuda mi hopi den mi actitud cerca e hende. Mi actitud bayendo na bida, anto mi actitud pa cu e cosnan negativo. Den mi caso, mi mester a pensa for di chikito busca diferente solucion pa cada situacion. Pensa diferente for di e resto. Tin hende ta bisa tin A y B. Ami ta bisa tin A, B, C… D como opcion pa logra un meta”, a manifesta.

Su mayornan semper a zorg pa Lefty keda activo y pa asina e por a sigui desaroya su mes den bida. Su motivacion di mas grandi semper tabata pa djis no stop.

“Bo por tin bo dishabilidad, pero bo no mester laga esey stop bo, den e sentido cu bo no por haci nada. For di chikito, mi a custumbra cu mi a nace sin man pero mi no a pensa cu mi no por haci esaki of cu mi no por haci esey. Mi a djis bisa mi ta bay hacie y si mi no a hacie y a wak pa diferente solucion”.

MENSAHE

Lefty nunca a yega di competi den deporte. Esaki ta su prome biaha pero e ta keda focus riba curashi. “Bay p’e”. En bez di wak’e negativo, wak tur cos como un oportunidad. Ya caba esey ta un logro grandi.

No pensa kico otronan ta bisa. Pensa pa bo mes. “Si bo ta bay haci algo, siña for di dje. No djis hacie. Siña di dje.

TRAINING

Pa awo no tin un dia fiho pa esnan cu kier train. Pero esnan interesa tin e posibilidad pa  topa Lefty y Luciano pa combersa y haci pregunta. Esaki por anochi despues di 6:30 na La Cabana, di dialuna pa diabierna.

Mester mira ki tipo di discapacidad e persona tin ya cu por ta e no por haci e parti di bringamento, pero tog e persona por train y wak te na unda por yega.

Finalmente Lefty a manifesta cu no mester give up. Bo no mester bay un gym pa train. Tambe bo por hacie na cas. Busca e manera si sali afo, haci algo y mehora bo calidad di bida.

DIARIO kier expresa tur sorto di exito na Lefty den su preparacion pa Tokyo 2010 y di mesun forma kier motiva mas persona cu ta na cas y cu tin algun sorto di discapacidad fisico of intelectual pa bira activo.

E sosten di sponsornan tambe como di otro instancianan ta importante pa por duna balor na e esfuerzo cu e personanan aki ta haci pa drecha nan calidad di bida. Vooral si ta trata di actividadnan cu tin di haber cu un deporte pa hiba Aruba dilanti.

 

 

 

- Advertisement -

DUNA COMENTARIO

Please enter your comment!
Please enter your name here