Home General Lo bay bek na e sistema di plachi y no lo tin...

Lo bay bek na e sistema di plachi y no lo tin sticker mas

805
0
SHARE
- Advertisement -

ORANJESTAD   (AAN): For di 2015 e plachi di number no a wordo cambia mas. Awo cu e sistema nobo aki, toch por mira cu e impuesto pa vehiculo di motor, no ta wordo bon paga. Segun Meverly Romano, vocero di Departamento di Impuesto, e motibo di esaki por ta diferente. Por ta cu e automobilista no ta worry pa e paga su belasting, e por ta tambe cu su situacion financiero no ta permiti’e. Por compronde esey, pero una bes cu un persona tin un auto, e tin obligacionnan cun’e. Mesun cosnan ta conta pa e obligacion di seguro, obligacion di keuring, etc. Por ta cu e automobilista djis kier haci wega tambe. A ripara cu e plachi blauw a wordo falsifica na diferente forma. Tambe e ta wordo traha den diferente forma. A ripara cu tin hopi plachi cu ta den forma di sticker, den forma di otro tipo di material.

E hecho di no a cambia plachi tur aña a causa e efectonan aki, a causa e parti negtivo aki. Esey no mester ta asina, pasobra un persona cu ta responsabel cu su belasting, no ta bay haci algo asina. Pero el a bira manera un tipo di free for all. Alabes tambe a ripara cu hasta e sticker mes ta wordo falsifica.

Di parti di Cuerpo di Polis a haya nan varios biaha ta bin verifica cierto stickernan dudoso cu nan ta detecta durante control. Nan ta bin cu nan na Departamento di Impuesto pa por verifica si berdaderamente e sticker ta falso. Di biaha ta ripara cu e stickernan ta falso. Pa e parti di control di sticker tambe a bira hopi fastioso pa polis y p’esey awor aki a keda dicidi cu conhuntamente tambe cu minister di finansas, cu ta bay bek na plachi nobo. Lo introduci plachinan nobo pa aña 2019 y ta spera e ora cu e fenomenonan negativo aki lo por wordo elimina.

Segun Romano, a wak e problematica mas leu. Tin dos cos cu ta bay hunga un rol hopi grandi pa e clientenan aki, cual ta esnan cu no a haci pago. E clientenan cu ta cumpli debidamente, por kita sombre pa nan, mirando cu nan ta hopi responsabel pa nan debernan. Esaki ta pa e grupo di esnan cu no ta cumpliendo. E grupo aki ta bay haya un djis aki un cobransa adicional, plus 50% di boet. Na momento cu cuminsa acepta pago di e belasting di 2019, nan no ta bay wordo permiti pa paga 2019, tanten cu nan caba di paga tur e debenan bieu cu tin. Awor aki si tanto aña, un of dos of mas aña nan no a haci e pago riba belasting, awo aki ta bay yega e momento cu nan mester cumpli cu e pago y financieramente e por cay nan mas pisa, pasobra no lo bay acepta pago pa 2019, tanten cu 2017 y 2018 ta completamente paga.

Pa 2019, e color di plachi lo bira oranje cu blanco. E background ta oranje y e letter y cifranan ta blanco.

A haci cierto cambionan den e plachi. A haci cambionan den e tipo di cifra, e tipo di letter cu tin riba e plachi. E color lo bay ta di material reflectivo. E ta reflect ora cu luz dal riba dje. E costo lo ta un tiki mas. Esey tin toch bon cooperacion cu e comerciante cu ta percura pa traha e plachinan. Ta den contacto estrecho cun’e y ta spera cu por keda cla na tempo pa tur e automobilistanan por ricibi nan plachi di 2019 manera cu den pasado ya tabata custuma cun’e.

Segun Meverly Romano, normalmente Departamento di Impuesto ta habri posibilidad di pago na cuminsamento di December, pero e plachinan ta calcula cu lo por cuminsa parti nan na mita di December. Esaki ta algo tentativo si. Tin cu wak ainda si e ta haalbaar, pasobra no mester lubida cu e cantidad di vehiculonan di motor ta bira aña pa aña mas hopi. Awor aki tin un total di 85.562 vehiculo di motor registra den tur e categorianan. E ta keda crece aña pa aña. Ta purbando awor aki pa toch otorga e plachinan pa den e mita di December mas of menos. Tin cu wak ainda si esey ta haalbaar si. Pero esey ta e idea te awor aki.

Te awor aki e tarifa ta keda mesun cos. Romano no por a duna mucho detaye si lo bin cambio of no, pero te awor aki e prijs ta keda igual.

Pa loke ta trata sticker, no ta bay tin sticker mas pa 2019. Ta bay bek na e plachinan manera cu ta custuma cun’e. E sticker ta wordo elimina.

Pa 2020 ainda no por duna ningun detaye concreto. Esey lo tin cu wak mas despues. Pero pa awor aki, pa 2019, sigur lo bay tin plachi nobo pa tur e vehiculonan di motor cu ta trafica riba nos careteranan.

 

- Advertisement -

DUNA COMENTARIO

Please enter your comment!
Please enter your name here