Home Gobierno Lo revisa e reglamentacion riba huurmento di vehiculonan UTV

Lo revisa e reglamentacion riba huurmento di vehiculonan UTV

81
0
SHARE
- Advertisement -

Pa garantiza seguridad na e usuario:

ORANJESTAD (AAN) – Den conferencia di prensa, Dialuna mainta, Minister di Husticia mr. Andin Bikker, a referi na e accidente lamentable cu a tuma lugar recientemente, unda cu un hobencita turista crusero, procedente di Puerto Rico, a perde un pia.

Esaki a causa hopi conmocion no solamente na Aruba pero internacionalmente, segun por a tuma nota di e caso.

E mandatario a duna di conoce cu e instancia concerni hunto cu su persona ta revisando e rekisitonan pa por huur un vehiculo UTV.

E instancianan concerni lo haci un revision adecua pa garantiza e seguridad di esun cu ta opera e machine y su pasaheronan, pero mester semper wak e reglamentacion cu tin.

E dignatario a bolbe menciona cu pesey e kier bin cu e Academia di Ley, pasobra Aruba su reglamentacionnan tin biaha ta hopi anticua, y hopi hende no ta realiza cu Ley ta e curazon di e sociedad, pasobra na final di dia tur cos ta draai rond di ley.

Minister Bikker a subraya cu e ley di mas halto ta nos Constitucion, riba dje tin tratadonan internacional, despues ta bin ordenanzanan, decreto, decreto ministerial, etc.

Cualquier tema cu nos por pensa ta reglamenta den ley, ministerionan ta reglamenta den ley, pesey ley ta software di e computer cu yama pais.

Den e caso specifico cu el a referi na dje, e mandatario a pidi conseho di e departamento concerni pa wak si e reglamentacion ora un persona ta huur un vehiculo manera UTV, si ta completamente up to date.

E minister a investiga con internacionalmente esaki ta bay y a ripara cu den diferente pais ta bin cu recomendacion specifico pa e vehiculonan aki, pa seguridad.

E mandatario a observa cu tin paisnan cu ora un persona ta bay huur un vehiculo asina nan ta dune minimo 15 minuut di instruccion pa wak si e ta compronde con esaki ta funciona. Esaki pasobra nan por parce similar na un auto, pero no ta auto y tin personanan cu kizas, nan ta core un vehiculo asina pa prome biaha den nan bida.

E mandatario ta haya na su lugar ora di bay over pa huur un vehiculo asina, reglamenta cu e personanan ta suficientemente conciente di ki tipo di vehiculo nan ta bay opera, y duna nan instruccion un rato pa nan compronde e normanan di seguridad.

E mandatario a reitera cu nan ta bezig observando y wak con por yega na un mihor optimalizacion di reglamentacion di e UTV’s aki, logicamente de consulta cu ministerraad y cu e minister encarga cu transporte.

 

 

- Advertisement -

DUNA COMENTARIO

Please enter your comment!
Please enter your name here