Home Hudicial Manager di un hotel kita pa ta molestia empleadonan femenino

Manager di un hotel kita pa ta molestia empleadonan femenino

512
0
SHARE
- Advertisement -

ORANJESTAD (AAN) – Recien den Corte di Husticia di Aruba a tuma lugar un caso di un persona masculino contra un hotel. Esaki pasobra e persona, ocupando un posicion di manager di cafetaria, a wordo kita. Ta asina cu na Maart 2018 e persona aki a wordo suspendi di e hotel pa investigacion riba kehonan di empleadonan pa “discrimination, bulling, sexual advances”. Dia 9 di April 2018 e persona a wordo kita di inmediato.

DIARIO a haya sa di e caso aki y ta haya interesante pa informa comunidad di esaki. Den e carta di retiro cu e hotel a manda pa e persona ta mustra diferente kehonan di empleadonan femenino hopi serio y esey a pone cu e biaha aki gerencia di hotel a dicidi di kita e persona. Ta asina cu den pasado e mesun persona aki a yega di haya aviso pa cu su comportacion. Esaki tabata na 2008, 2009 y 2010, caminda hasta ta papia di “sexual harassment”.

   ACUSACIONNAN

E hotel den su carta ta menciona cu dia 24 Maart 2018 un empleada di un contratista a haci keho contra e persona aki. E empleada a bisa cu mas o menos 2 luna promer, e persona aki a informa e empleada cu empleadonan di contratista lo bay traha menos ora y cu esey lo ta mas o menos 300 florin menos di su salario. E persona lo a ofrece e empleada 300 florin si e empleada sali cun’e riba e empleada su dia liber. E empleada a nenga e oferta aki.

Na Februari 2018 ora cu e mesun empleada aki tabata malo na cas, e persona lo a yam’e y insisti pa bishit’e na su cas. Mirando e insistencia, e empleada a bay di acuerdo pero tabata sinti incomodo pasobra e no tabata mira necesidad pa e persona bishit’e. Despues cu e empleada a reanuda trabao mas tempran cu a spera, esey riba insistencia di e persona, e persona lo a mishi na su atras ora cu e empleada aki tabata traha den cafeteria na e seccion di juice. Esaki lo mester a sosode dia 18 Februari 2018.

Mirando e comportacion di e persona pa cu e empleada, e empleada a busca manera di cambia di su “station” caminda e lo no cay mas bou supervision di e persona aki. Sinembargo despues cu e empleada a logra haya e cambio den “station”, e persona aki a bay insisti cu e otro manager pa e empleada bolbe su posicion. E empleada a sinti su mes asina menaza cu el a informa e compania cu e no kier sigui traha mas.

E hotel ta mustra cu e persona a wordo suspendi 28 Maart 2018 pendiente investigacion riba e caso ariba menciona. Mientras cu tabata investigando esaki, dos otro empleada a bay haci keho contra e mesun persona pa cu su comportacion pa cu nan. Un di e empleadanan a informa gerencia di hotel cu mas o menos 3 luna pasa, e persona lo a haya un comentario no na su lugar pa cu e relaciona cu un potret di e empleada aki cu e persona a mira riba Facebook.

Segun e empleada e persona a referi na e potret y a expresa: “me quiero enredar en tu cabello”. Ora e empleada a bisa e persona cu esey lo no sosode, e persona lo a ofrece 1.000 florin pa e empleada laga esaki sosode.

E otro empleada a informa cu na 2017, na un ocasion e persona aki a dun’e un sunchi den su boca ora cu e empleada tabata trahando. E empleada tabata hopi rabia cu e comportacion di e persona y a bis’e cu ningun momento el a permiti e persona dun’e un sunchi y cu nunca mas haci algo asina cun’e.

E hotel a mustra cu tabatin mas keho di otro empleadonan pa cu e trato di e persona aki. E hotel ta haya cu mirando e kehonan, e persona aki a trata e empleadonan na un manera sin respet y tin biaha hasta referi cu nan ta “handicap”. Hasta tabatin un ocasion cu e lo a haci comentarionan riba orientacion sexual cu a laga e empleada sinti hopi incomfortabel. E empleadanan tabata sinti nan mes “bullied” pa e persona aki y algun cu no ta Arubiano a hasta sinti nan mes discrimina.

    PERSONA TA DESMENTI

Hotel ta mustra den e carta di retiro cu 5 April 2018 nan a reuni cu e persona caminda el a desmenti tur e kehonan contra su persona. El a solamente admiti cu el a bay bishita e empleada na su cas ora cu e tabata malo. Segun e persona, el a bay ariba insistencia di e empleada.

Hotel a mustra cu apesar cu e persona ta desmenti tur e kehonan, hotel no tin ningun motibo pa kere cu e empleadanan lo haci keho falso contra e persona. Especialmente si mira e detayenan cu e empleadanan a duna di kico e persona aki a haci.

Hotel tambe a mustra cu esaki no ta promer biaha cu e persona aki a haci cosnan asina. Nan a referi na avisonan cu e persona aki a yega di haya caba pa e mesun tipo di comportacion akin a 2008, 2009 y 2010.

   ACTUA SIN RESPET

E hotel ta haya cu e persona aki a viola e reglanan di e hotel. Mas ainda den e posicion di manager, mester tin un actitud ehemplar pa cu e empleadonan. E hotel ta haya cu e persona a actua sin respet. Su accionnan pa cu e empleadonan tabata ofensivo y ta wordo considera un violacion serio di “harassment” y conducta profesional. Esaki ta haci cu e hotel a perde tur confianza den e persona aki. Pesey e hotel a dicidi di kita e persona aki desde 29 April 2018.

   EVALUACION DI HUES

E persona a cuminsa un caso contra e retiro y Hues den su evaluacion ta haya cu den e carta di retiro ta suficiente cla pakico e persona a wordo kita di inmediato. Hues ta haya cu for di e carta por conclui cu e persona a actua incorecto. Hues ta mustra cu e hecho cu e persona ta desmenti tur cos, no por bay tene na cuento cu por ta el a mira e situacion otro y cu ta duele loke el a haci. Hues a sigui bisa cu no tin motibo pa duda den e declaracion di e otro dos empleadanan. Hues a mustra cu e ta haya e retiro na su lugar y ta rechaza e demanda di e persona.

 

- Advertisement -

DUNA COMENTARIO

Please enter your comment!
Please enter your name here