Home Enseñanza Marisol Lopez-Tromp mustrando riba retonan pa Presupuesto 2018 na beneficio di Enseñanza...

Marisol Lopez-Tromp mustrando riba retonan pa Presupuesto 2018 na beneficio di Enseñanza di Aruba

48
0
SHARE
- Advertisement -

ORANJESTAD (AAN): E deseo di hopi hende, ta pa Ministerio di Enseñanza haya e suma di mas grandi riba Presupuesto di un Pais.

Na Aruba, mirando e presupuesto, t’asina tambe cu den Parlamento e topico aki a bin padilanti cu e Minister di Enseñansa actual, kende a splica kico e tin pensa di haci riba diferente area.

Marisol Lopez-Tromp di Partido POR, a mustra cu aña escolar a habri y e ta un topico pa invita e Minister concerni pa splica kico e ta wak como retonan y con e ta pensa di soluciona nan. E problemanan cu a worde menciona ta espacio, materialnan, hasta facilidadnan di baño, etc.

Awo tin 29 pa 30 mucha den un klas y bañonan ta traha pa un klas di por ehempel 10 of 15 mucha. Tur esaki ta cosnan cu ta treciendo problema na e schoolnan. E hecho cu e cantidad di mucha a crece ta motibo suficiente pa traha mas facilidad.

Segun señora Lopez-Tromp, e presupuesto 2019 lo tin cu bay duna un refleho mas realistico di e retonan cu tin, pasobra e presupuesto anterior ta uno cu Gobienro no a haya bon y mester a adapt’e p’e por cumpli cierto retonan cu Aruba como pais tin. No ta un secreto cu mester a corta na diferente caminda p’e por cumpli cu e retonan financiero. Sin embargo, bao di cada Minister of Ministerio tin prioridadnan.

Aki ta caminda cu Gobierno a acorda aña pasa p’e Crisis Plan, cual ta un prioridad pa nos muchanan. Parlamento a aproba e miyones pa esaki y aworaki e ta bayendo den ehecucion. Pero no ta pasobra Parlamento a aproba un suma cu e ta disponibel mesora p’e gobernantenan, pasobra nan tin cu bay hopi biaha den procedura di destaho, mester prepara nan plan, y una bes cu esaki ta cla, nan mester maneha tambe cu Directie Financien, departamentonan huridico, kiermen e ta tuma su tempo.

Y hopi biaha prome cu keda cla, fin di aña a yega y e placa no ta disponibel mas. Esey ta e proceduranan cu tin pa cu e leynan actual di Aruba. Den transcurso di tempo varios gobernante a opta pa lanta fondonan specifico. Aworaki nan a haya un carta caminda ta urgi pa un fondo p’e Crisis Plan Social p’asina Gobierno por uza e placa na momento cu mester por dedik’e na un proyecto caminda cu tin crisis y no por warda pa bisa cu ta bay haci’e dentro di seis luna, pasobra e ora no ta un crisis mas y no a atende esaki pa cual e placa cu a worde poni.

E tin di haber tambe cu e proceduranan cu ta ancra den ley y dimes ta tuma su tempo y mester prepara hopi bon pa splica y hustifica con ta bay uza e placa y pa esaki despues worde aloca. Ta varios aspecto cu ta hunga un rol una bes Parlamento aproba e presupuesto, e ora e trabao ta cuminsa.

Tempo no ta warda mientras e cantidad di mucha ta sigui aumenta na schoolnan y tampoco por t’asina cu mester warda añanan prome cu nan traha facilidadnan nobo na schoolnan. Esaki señora Lopez-Tromp ta bisa cu tin di haber cu planificacion, dus e maneho di e pais pa loke ta poblacion y con grandi nan kier wak e crece. E no ta un secreto cuanto mucha ta nace pa aña.

Tin cifranan riba esaki cu por pronostica kico ta bay ta por ehempel pa school basico y tambe p’e kleuternan, caminda tambe tin necesidad pa klasnan nobo. Tin tambe e maneho di admision. E cartera di Enseñansa no ta esun cu ta controla legalidad of ilegalidad di un persona. E ta brinda enseñansa y e mucha tin derecho riba dje.

E ora e ta haya enseñansa, no obstante su situacion di documentacion. Kinan mester di un maneho cu por premira con por brinda educacion na muchanan cu ta den situacionnan asina. Hopi biaha den practica tin e situacion cu nan ta stimula economia y bin cu yen di proyectonan. Proyectonan ta nifica por ehempel hotelnan nobo mester mas trahado.

Ta papiando di centenares di hende, tin biaha miles cu tin cu drenta, tin situacionnan cu famia, etc. Tur esaki tin un impacto riba nos pais. E ta cuestion di un vision con grandi nan kier crece e pais, ki rumbo nan kier bay, y planifica a base di esaki pa por traha p’e muchanan por haya cuponan den nos enseñansa

 

- Advertisement -

DUNA COMENTARIO

Please enter your comment!
Please enter your name here