Home Gobierno Minister Bikker lo presenta un concepto di ley na Ministerraad otro siman

Minister Bikker lo presenta un concepto di ley na Ministerraad otro siman

16
0
SHARE
- Advertisement -

Pa haci un cambio di ley riba libertad anticipa:

ORANJESTAD (AAN) – Den conferencia di prensa extraordinario yama pa Minister mr. Andin Bikker, tocante e publicacionnan den prensa Diabierna mainta, relaciona cu un caso di intento di abuso sexual cu a keda den libertad causando disgusto den pueblo, e dignatario a subraya cu e semper ta busca solucion.

Ayera mainta el a papia di biaha cu Ministerio Publico y su coleganan den e Gabinete, y a propone na nan cu otro siman e ta bin cu un concepto di ley pa haci cambio den e ley concerni cu ta concede e personanan den prison libertad anticipa.

E dignatario a menciona cu na Hulanda, for di unda Aruba su leynan ta deriva, no solamente nan a cambia e ley riba e tema menciona dos biaha, pero aworaki tin otro propuesta di ley cu Minister Dekker, encarga cu proteccion legal, a propone, unda basicamente e kier elimina e cumplimento di 2/3 di castigo pa sali den libertad.

Esaki ta rekeri si pa bin cu un edificio pa KIA nobo y mas amplio, pasobra na final di dia, cu 259 cupo no por yega na e capacidad pa alberga tur e personanan cu ta comete crimen, y mester amplie te minimo 300.

E mandatario a institui un task force cu ta trahado fuertemente riba esaki, pero e retonan semper ta keda e fondonan. Pesey semper e ta bisa cu e deseonan ta hopi pero e fondonan ta limita. Y pa bay traha un KIA nobo lo tuma basta miyon florin cu gobierno no ta dispone aworaki cu tin retonan grandi. Gobierno ta trahando pa soluciona esaki diligentemente, pero no ta algo cu ta bay sosode di un dia pa otro y pesey e kier bin cu e cambio di ley.

Minister Bikker a subraya cu tambe tin un Ordenanza Penitentiaire Beginselen cu un persona por haya cas pa prison obligatorio sin cu e mag bay ningun otro caminda, e por bisti un banchi electronico na su pols mientras e ta cumpli e tempo cu su castigo cu falta. E sistema aki ta yama electronic toezicht via cual por tin control riba e persona.

Otro siman e mandatario ta bay formula e Decreto Ministerial, y lo pone un plafond pa 2018, na espera di e cambionan di ley y tambe di e ley penitenciario cu por tin cas como prison. Minister Bikker a subraya cu, en todo caso, durante e resto di e aña aki lo no tin mas di persona cu lo bin na remarca pa sali mas tempran den libertad.

Tambe e persona reemplazante cu ta suppose di observa cierto maneho cu algun persona cu a comete crimen NO ta bin na remarca pa sali den libertad mas tempran y cu e no a aplica no obstante cu e ley no ta distingui, e dignatario a papia cu Ministerio Publico pa trece al tanto y recorde riba e maneho aki. E concepto di ley lo wordo manda otro siman pa Ministerraad.

Otro paso cu e mandatario a tuma y a papia di dje cu Ministerio Publico ta pa recorda e reemplazante cu ta observa e maneho y duna recomendacion na OM, pa aplica e maneho menciona, y tambe pa ora di manda e conseho pa e minister, e comision y OM mester ta completamente explicito kico e persona a comete.

Por ehemplo den e caso cu a pone bin cu e conferencia di prensa aki, e mandatario a reitera cu ta papia di intento di abuso sexual, pero no ta bisa cu tabata tin violacion.

E mandatario a menciona tambe cu el a mira cu na Hulanda no ta e Minister di Husticia ta sinta evalua e casonan aki mas pero nan a hacie un toots obhetivo, y por pensa den direccion cu kizas e mesun Corte cu ta duna e castigo, of Ministerio Publico, por haya e tarea di evalua si e persona por haya dos of tres luna prome cu caba e castigo, su libertad.

 

- Advertisement -

DUNA COMENTARIO

Please enter your comment!
Please enter your name here