Home Gobierno Minister Bikker ta pidi pueblo disculpa

Minister Bikker ta pidi pueblo disculpa

189
0
SHARE
- Advertisement -

ORANJESTAD (AAN) — E caso di e Pedofil cu a haya un sentencia di tres aña cera den prison y cu a wordo laga den libertad prome cu e cumpli full su sentencia, a capta hopi atencion y indignacion den pueblo, y tur e dianan aki e noticia desagradable aki ta di dominio publico.

Den conferencia di prensa di gobierno, Dialuna ultimo, Minister Bikker ta pidi pueblo despensa pa e fout interno cu a wordo cometi.

E pregunta a surgi den conferencia di prensa, den cual el a wordo mustra cu comunidad ta tira falta riba dje pasobra na final ta Minister ta firma prome cu laga e persona bay.

Minister den otro conferencia di prensa a indica caba cu esaki tabata basa riba un conseho duna pa eror for di un funcionario di KIA, door di e ley 37 cu ta concede libertad na presonan cu a cumpli 2/3 di nan condena. Ademas e dignatario a splica cu esaki tambe ta debi cu KIA ta sobre popula.

Hopi ta sinti cu e mandatario a firma ciegamente e libertad di e pedofil y esaki a genera hopi disgusto y discusion den pueblo.

E dignatario a expresa al respecto: “Na final di dia mi ta Minister, pero den e caso specifico aki, manera mi a splica Diabierna, esaki tabata un falta di comunicacion interno, y mi a bin cune tambe den conferencia di prensa.

Loke ta poni of no ta poni tocante e delito nos no a identifica esey. Awor mi a pidi pa mas informacion, y tambe pa bin cu un paro riba articulo 37 y cu mi no kier tende nada mas cu un persona a wordo laga den libertad prematuramente, y respecto ki crimen nan a comete”.

Minister Bikker a señala tambe cu mester cambia e ley. Despues di a reitera con e proceso ta bay ora Corte of Ministerio Publico ta duna conseho pa laga un detenido bay den libertad, Minister Bikker a pidi pueblo disculpa.

“Abiertamente, ami ta pidi pueblo disculpa pa e falta di comunicacion aki, pasobra na final di dia ami ta keda responsable como minister y mi no ta core pa e responsabilidad aki”, e mandatario a expresa.

E dignatario a indica cu ora e señala cu algo a bay fout di biaha e ta bin cu recomendacionnan y accionnan concreto. “Na final di dia tur e polemica aki ta pasobra KIA ta sobre popula, y den ocho aña largo e gobierno anterior no a haci nada pa renova y amplia KIA”, Minister di Husticia a reitera.

 

- Advertisement -

DUNA COMENTARIO

Please enter your comment!
Please enter your name here