Home Parlamento Minister Bikker ta pone cara di sistema hudicial di Aruba na berguensa

Minister Bikker ta pone cara di sistema hudicial di Aruba na berguensa

31
0
SHARE
- Advertisement -

Parlamentario di AVP Arthur Dowers:

ORANJESTAD (AAN): Ta un hilaridad pa ex Minister di Husticia Arthur Dowers scucha con Minister di Husticia Andin Bikker ta trata di tira e culpa di liberacion di un pedofiel riba otro hende. Mirando e falta di maneho y e blundernan cu e ta comete, aparato di husticia di Aruba ta worde poni na berguensa den Reino y internacionalmente.

Fraccion di AVP a tene su conferencia unda a hiba palabra Parlamentario Arthur Dowers, kende a baha basta fuerte riba Minister di Husticia Bikker pa su incompetencia di maneha Ministerio di Husticia despues cu pa ocho aña largo el a gaba di tin un ‘plan di maneho’ y cu su antecesor si no tabatin un plan di maneho, y hasta el a worde atrapa ta gaña. Un persona asina, mester tuma honor na su mes y pidi su retiro.

“Mi a scucha  e minister aki papia y bay gaña cu ta pa falta di otro hende el a comete e eror aki. Ta tur loke el a haci te awor of tur loke cu bay fout te aworaki na e pais aki, e ta bisa ta falta di Minister di Husticia anterior, falta di ambtenaarnan, falta di tur hende y menos di dje.

Mi a tende hasta awor cu el a bay papia di un Minister di Husticia q.e.p.d. y hasta el a worde culpa pa e hecho cu sr. Bikker a laga un pedofiel bay. Mi ta kere cu esaki ta un berguensa. Mi ta kere cu sr. Bikker mester realisa cu e trabao di Minister no ta bisti bachi y keiro anochi bebe den bar.

Trabao di Minister di Husticia ta sinta den bo oficina, cera cabes cu e hendenan cu tin conocemento y traha na bienestar di e pueblo.”

Pero despues di ataca e Minister di Husticia anterior cu e no tabatin un maneho, awor e mes ta duna prueba cu si tabatin un maneho, segun parlamentario Dowers a bisa den su conferencia di prensa.

“Aworaki bo ta tende e Minister di Husticia ta bisa pueblo, y esaki ta prueba di e maneho cu a worde hiba den pasado, cu nos sistema hudicial ta funciona asina bon cu prizon continuamente ta yen y cu ta soluciona 90% di tur casonan. Awor Minister bo por splica e pueblo ta ken ta esunnan cu a traha pa logra pa soluciona 90% di delitonan. Den pasado bo a bisa cu no tin maneho, cu Korpschef ni Minister no ta sirbi. Niun hende tabata sirbi pero aworaki bo ta gaba e hendenan aki pasobra ta e unico cos cu e tin pa wanta na dje.

Tin un bon trabao cu a worde haci cu abo no a duna ningun contribucion na dje pasobra ta awo bo a bini ey. Un cos ta hopi cla si, loke cu bo a haci te aworaki ta daño y bo a pone Husticia y Aparato Gubernamental na berguensa.

Na mas cu un ocasion bo a pone cara di KIA, Ministerio Publico y Cuerpo Policial na berguensa  Mi ta kere cu e momento a yega, mescos cu bo ta pidi tur siman pa mi tuma mi retiro sin un argumento drechi, pa abo tuma bo retiro. Ta bon pa bo tene honor na bo mes pasobra sali pidi disculpa den nomber di ‘spin dokter’ no ta libera bo di e fayo grandi cu bo a comete.”

Loke cu e mandatario mester compronde, segun Dowers, ta cu Husticia ta un sistema di cooperacion entre diferente partner local y tambe partnernan internacional.

“Na momento cu abo cuminsa demostra cu bo ta un Minister di Husticia cu no sa kico bo ta haci, bo ta perde credibilidad den Reino y nos pais ta perde credibilidad internacionalmente. Danki Dios cu na e momentonan aki e credibilidad di nos sistema hudicial ta hopi halto. Nos tin un reserva basta grandi cu por bay cun’e ainda y e sistema por wanta poco sla di e desaster y erornan cu e Minister aki ta comete. Pero mi ta spera cu esaki no keda sosode, ya cu e lo tin como consecuencia cu nos sistema ta perde credibilidad,” Parlamentario Arthur Dowers a declara.

 

- Advertisement -

DUNA COMENTARIO

Please enter your comment!
Please enter your name here