Home Gobierno Minister Dangui Oduber contento con AruBIG porfin ta bira un realidad

Minister Dangui Oduber contento con AruBIG porfin ta bira un realidad

36
0
SHARE
- Advertisement -

ORANJESTAD (AAN): Manera DIARIO a trece dilanti caba, Minister di Salubridad Publico Sr. Dangui Oduber a anuncia den conferencia di prensa di dialuna ultimo cu AruBIG ta bira un realidad.

Conforme e acuerdo di e gobernacion actual un di e puntonan mas importante ta pa mehora e calidad di nos cuido medico.

Actualmente tin un scarcedad grandi di specialistanan, esaki ta un di e motibonan principal cu un pashent tin cu warda lunanan pa por haya un cita cerca di un specialista. Un di e maneranan cu gobierno lo zorg pa mehora e probema aki ta door di aumenta e cantidad di specialistanan cu por practica legalmente. E idea ta pa yena e vacaturanan aki cu yiunan di tera cu a studia medicina den exterior.

Den cuadro di esaki Minister Dangui Oduber a instala un comicion, e comicion aki su tarea ta pa realisa e vision di gobierno. Un punto importante pa cu e comicion aki ta e garantia di experticio y profesionalismo di e profesionalnan. Despues di 6 luna di tempo e comicion aki a yega cu un proposicion riba mesa.

E proposicion aki ta consisti cu na banda di e registro actual di BIG y CANMED, tambe lo bin cu un organo di acreditacion cu lo señala den ki termino lo reconoce e profesionalnan medico den nos region. Aki nos lo enfoca riba e yiunan di tera cu a termina nan estudio medico. E yiunan di tera cu tin un diploma cu ta acredita door di e organo di acreditacion cu gobierno a institui lo haya e prioridad pa traha como medico na Aruba.

Minister Oduber actualmente ta den diferente discusion pa yega na posibilidadnan pa busca cuponan di trabao pa yiunan di tera na hulanda y tambe den nos region, pa asina Aruba lo por amplia e cantidad di specialistanan. A base di un planificacion di personal pa specialistanan medico nos lo haya un bista riba e situacion actual, mediano y tambe a largo plazo kico ta e necesidad na aruba.

Na banda di e nombramento di e organo di acreditacion, Minister Oduber ta en espera di un conseho riba e establecimento di un instituto di calidad (kwaliteitsinstituut) cu entre otro tin e tarea pa reconoce e estudionan y e diplomanan den area di cuido medico. Esaki ta pa garantisa e calidad den cuido medico. Pa logra esaki Minister lo busca ayudo di organizacionnan international cu tin experencianan amplio riba e terenonan aki.

 

- Advertisement -

DUNA COMENTARIO

Please enter your comment!
Please enter your name here