Home Gobierno Minister Dangui Oduber ta bay lanta un Fundacion nobo pa genera fondo...

Minister Dangui Oduber ta bay lanta un Fundacion nobo pa genera fondo pa deporte

31
0
SHARE
- Advertisement -

ORANJESTAD (AAN)—Den conferencia di prensa di gobierno, Dialuna, Minister di Turismo, Salud y Deporte sr. Dangui Oduber, a elabora tambe riba e tema di Lotto pa Deporte.

E mandatario a señala cu ainda gobierno y Lotto ta den un situacion di Corte cu otro. Si tur cos bay bon entre November y December lo tin un sentencia di Huez, riba e proceso.

E dignatario a señala cu manera ta conoci  na comienzo di aña a pidi e hunta di supervision di Lotto pa Deporte pa cede nan asiendo y nan no a bay di acuerdo, y consecuente e mandatario a haci uso di Statuto, cu ta brinde e posibilidad pa kita e miembronan di Hunta di Supervision, el a manda un carta pidiendo nan retiro y nan a lanta un caso den Corte cu ketobay ta andando.

E mandatario a subraya cu unico motibo pa cual nan ta keda ta pasobra nan ta wordo paga 6 mil florin. E unico miembro di e hunta directiva aki cu ta cobra e salario aki tin deporte secuestra. E mandatario a subraya cu nan ta un cartel cu ta kere cu a bira doño di deporte.

Aworaki cu tin weganan di fogueo di futbol no por haci uso di un stadion cu ta resorta bao di Lotto pa Deporte, pasobra Concacaf a Keur-af e stadion y aworaki no por hunga futbol na Aruba pero mester bay na Curacao.

El a subraya cu sr. Diestefano Wernet ta paga su propio compania di account pa paga lotto. E mandatario a subraya cu gobierno kier yega na un solucion pa Lotto pa Deporte, cu ta sufri den man di e cartel aki.

E mandatario a subraya cu gobierno a purba di yega na un acercamento cu Canadian Bank Note Company, pa sali for di e impase aki pa deporte mira cada florin cu ta wordo cumpra na Lotto. Dia 26 di Juli un carta di CBN dirigi na Diestefano Wernet, di cual gobierno a haya copia, nan ta bisa cu sr. Wernet a lanta placa di e banco aki sin su conocimento, siendo cu e tin cu duna cuenta cada bez cu placa ta wordo saca for di e cuenta, sea pa paga premio of pa inverti den deporte.

Pero den e caso aki el a lanta 600 mil florin sin bisa ningun hende. El a keda keto, y despues CBN a haya sa cu sr. Wernet fuera di a cobra 300 mil florin caba a lanta e suma aki sin avisa e banco pakico. E banco ta pidi sr. Wernet splicacion pero te awe e no a duna cuenta por escrito tocante esaki. E no ta wordo controla como director pa e Hunta di Supervision, cual tampoco kier duna cuenta, segun e dignatario.

El a subraya cu te ainda gobierno no a ricibi e cuenta anual di Lotto cu nan a pidi for di comienzo di gobernacion, y logicamente como Minister, el a cuminza perde pasenshi.

E minister a remarca cu no solamente CBN ta beneficia cu e acuerdo cu tin cu Lotto, pero tin un cartel cu a haci su mes doño di Lotto pa Deporte y tin un director cu a lanta un miyon florin sin duna cuenta.

CBN a mustra su disponibilidad pa yega na un acuerdo y soluciona e problema aki, pero lamentablemente no a yega na otro.

E mandatario a subraya cu no ta keda nada otro cu lanta un fundacion nobo di Lotto pa competi cu Canadian Bank Note y cu Lotto pa Deporte, pasobra e facilidadnan deportivo ta den estado di deterioro, y e meta di e fundacion nobo ta pa genera fondo pa facilidadnan deportivo nobo y pa mantencion di esnan existente. Obviamente a placa cu tin aworaki ta bay pa paga abogado, pa companianan di mercadeo, pa saco di sr. Wernet y pa Hunta Directiva di Lotto, mientras cu deporte mes no ta haya nada.

Cada cooperacion cu pidi Lotto pa Deporte ta wordo nenga, segun e mandatario. Minister Oduber a subraya cu e ta sigur cu pueblo lo sostene e Fundacion nobo pa Deporte.

- Advertisement -

DUNA COMENTARIO

Please enter your comment!
Please enter your name here