Home Gobierno Minister Glenbert Croes a convoca reunion cu varios minister y diferente instancia

Minister Glenbert Croes a convoca reunion cu varios minister y diferente instancia

238
0
SHARE
- Advertisement -

Perdida di bida pa violencia domestico ta inaceptable

ORANJESTAD (AAN) — Minister di Asunto Social sr. Glenbert Croes, den conferencia semanal di Gobierno, Dialuna mainta, na un manera hopi conmovi a referi na e caso di e dama cu a fayece a consecuencia di maltrato domestico cu a tuma lugar Diadomingo, y e dama a bin muri na Hospital Dialuna madruga.

Minister Glenbert Croes a expresa cu esaki ta un noticia hopi lamentable, cu cual siman a habri, y cu atrobe a shock nos comunidad. E dignatario a señala cu e suceso aki a conduci cu señora a perde su bida door di abuso cu a tuma lugar unda un homber a bati un hende muher.

E mandatario a stress riba e hecho cu e noticia aki mester pone nos tur keda corda riba e crisis social cu gobierno a declara y cu a haya raiz den e asesinato di e dos criaturitanan na final di aña pasa.

E mandatario a señala cu e hecho aki ta mustra cu e situacion di crisis social no a calma ni a bira menos, no obstante gobierno y instancianan concerni ta trahando duro pa atende cu e problemanan social, alivia y mehora nan, pero e realidad ta cu casonan manera esun aki, ta bisa cu gobierno por ta trahando duro, pero loke e ta haciendo no ta suficiente.

E dignatario a expresa cu esey ta mustra cu no por touch e bida di tur hende pa impedi tur caso y evita pa asuntonan bay for di man, pero realidad ta cu mester puntra si e esfuerzonan cu ta wordo haci ta suficiente.

“Na mi opinion ta cu no obstante con duro nos ta trahando, mi ta conclui cu nos no ta haciendo suficiente.

Y pesey mes, mi a pidi e cooperacion di diferente minister pa un reunion cu mi a convoca pa Diahuebs awor, teniendo cuenta cu schedule di tur hende, pero e urgencia cu cual nos mester actua, unda cu Minister Presidente, mi persona, Minister di Husticia y Minister di Salubridad Publico hunto cu diferente departamento, entre otro Fundacion di Hende Muher den Dificultad, Ministerio Publico, DAS, KPA, entre otro.

Esaki  pa mira kico mas nos mester ta haciendo y unda mas nos mester primi den e cuadro di implementacion di e plan di crisis social pa nos por alivia e presion di e crisis social na Aruba”, e dignatario a subraya.

Minister Glenbert Croes a subraya cu e problemanan ta asina grandi cu resolve e situacionnan grave cu ta sutando den mente y alma di hogarnan y den e bida di tur hende na Aruba, kizas por bisa cu ta imposible, pero hecho ta cu mester haci e maximo esfuerzo.

“Loke a pasa awe madruga cu e perdida di bida di e señora ta intragable y inaceptable den e comunidad di cual nos ta forma parte di dje”, e mandatario a acentua.

El a agrega cu violencia domestico, abuso di hende muher, abuso en general riba muchanan, nos grandinan, etc., ta inaceptable den nos comunidad.

“ Y e plan di crisis social ta papia di no actua ora e suceso a tuma lugar, cu consecuencianan asina tragico y lamentable manera a tuma lugar den e caso cu a keda raporta den medionan di comunicacion. Nos mester por preveni pa asuntonan asina no tuma lugar. Henter e plan di crisis social ta pa nos atende cu e ‘red flex’ pa ora declara un emergencia, pa impedi cu algo grave tuma lugar”, e dignatario a remarca.

Actua mas tempran ta responsabilidad di nos tur, Minister Glenbert Croes a subraya. E ta responsabilidad di tur esnan cu ta den bida di hogarnan, famianan, den barionan unda por mira cu cosnan asina ta tumando lugar. “Tambe ta responsabilidad di gobierno cu mester percura pa tur instancia ta prepara pa actua. Si! E ta responsabilidad di departamentonan, instancianan, fundacionnan cu mester ta alerta. E situacion na Aruba ta exigi di nos tur cera cabes, traha duro na un manera conciente y e plan di crisis social ta dirigi riba esey”, Minister Glenbert Croes a reitera.

Minister Glenbert Croes a mustra hopi preocupa pa cosnan cu ta tumando lugar na Aruba y cu no mester sosode.

- Advertisement -

DUNA COMENTARIO

Please enter your comment!
Please enter your name here