Home Enseñanza Minister Lampe a introduci sr. Ryan Maduro como director general di Colegio...

Minister Lampe a introduci sr. Ryan Maduro como director general di Colegio EPI

152
0
SHARE
- Advertisement -

ORANJESTAD (AAN) – Minister di Enseñanza sr. Rudy Lampe, a anuncia den conferencia di prensa di gobierno Diahuebs, cu Colegio Profesional Intermedio “E.P.I” tin un director general nobo, den e persona di sr. Ryan Maduro.

Minister Lampe a expresa cu Colegio EPI ta un di e institucionnan di mas importante di Aruba. Awendia hopi biaha ta dificil pa hobennan cu tin un MAVO of un HAVO diploma haya trabao, pero si nan tin un EPI Diploma (MBO) mesora e mercado laboral ta habri pa e graduado.

Colegio EPI ta sumamente importante pa educacion y e mandatario a subraya cu e kier stimula mayornan y nan yiunan pa scoge Colegio EPI, pa asina aki nan haya un bunita ofishi, pa defende den bida y den famia.

E mandatario a subraya cu mester bira un realidad den nos comunidad cu tin un diploma MBO di Colegio EPI den nan man, ta un trayecto hopi importante, pasobra e ta bal oro.

El a anuncia, seguidamente, cu e director nobo di Colegio EPI ta sr. Ryan Maduro, cu a solicita pa e cargo den un solicitud habri cu tabata tin.

Minister Lampe a remarca cu sr. Maduro a crece den y cu e Institucion di Colegio EPI, e conoce di paden y pafo completamente. Sr. Maduro a forma parti di e Management Team di Unidad di Hospitalidad y aworaki ta haya un encargo nobo cu ta director general di Colegio EPI y den su man e ta pone e futuro di e Instituto aki. El a agrega cu sr. Maduro ta un persona den e Management Team, maestronan, y alumnonan. E dignatario a agrega cu sr. Maduro, recientemente, a haal su Master den Educacion loke ta nifica cu e ta prepara pa acepta e reto nobo aki.

Minister Lampe a subraya tambe cu tin hopi plan pa e fortalecimento di Colegio EPI y e tin hopi confianza cu e instituto aki ta den bon man den e persona di Ryan Maduro.

- Advertisement -

DUNA COMENTARIO

Please enter your comment!
Please enter your name here