Home Enseñanza Minister Lampe lo trata cu SMOA e aspecto di fondo social

Minister Lampe lo trata cu SMOA e aspecto di fondo social

66
0
SHARE
- Advertisement -

ORANJESTAD (AAN) — Tocante e costo halto di estudio na Colegio Arubano, cu ta un tema cu a wordo comenta den comunidad hopi y tambe riba rednan social, den conferencia di prensa a trece e observacion aki cerca Minister di Enseñanza sr. Rudy Lampe.

Esaki den sentido cu merecidamente tin subsidio pa e studiantenan di menos recurso  financiero, atravez di un fondo social cu Colegio tin, pero actualmente e costo di bida na Aruba ta asina duro pa un y tur, cu e grupo di recursonan mediano lo yega momento cu lo no por afford Colegio pa nan yiunan tampoco.

Esey ta crea e impresion cu den futuro ta yiunan di hende cu hopi placa mes so, lo por bay Colegio.

E mandatario a señala cu pa hopi aña caba Fundacion SMOA den cual e mes tabata miembro un tempo, representando obispado, a pone hopi enfasis, como fundacion catolico, pa tin un fondo social pa yuda e mayornan cu no por cumpli cu e rekisitonan financiero.

E fondo aki ta wordo maneha na un manera profesional, y e minister ta den contacto continuo cu e aspecto aki, pasobra en principio ningun mucha por keda sin bay Colegio pa motibo financiero.

E dignatario a subraya si cu a base di e preocupacion cu a wordo treci dilanti den prensa, esnan responsable di e fondo evalua, eventualmente, e normanan pasobra e mes como minister ta conciente, cu na e momentonan aki pa e mayornan di clase medio no ta facil pa afford esaki pasobra costo di bida a bira hopi caro.

Minister Lampe, bayendo un tiki mas leu, a expresa cu mirando cu e prijs di petroleo internacionalmente ta aumentando y cu esaki ta un tendencia mundial atrobe, ta importante pa esnan cu ta maneha e fondo social di Colegio evalua e normanan financiero pa wak e posibilidad pa esnan di recursonan medio tambe por bin na remarca pa haya e tipo di ayudo aki.

Minister Lampe a indica cu den su proximo reunion cu SMOA e lo trece dilanti e punto aki.

- Advertisement -

DUNA COMENTARIO

Please enter your comment!
Please enter your name here