Home Policial Mucha di 5 aña a perde pia den accidente entre UTV y...

Mucha di 5 aña a perde pia den accidente entre UTV y Van

1706
0
SHARE
- Advertisement -

Apenas e turistanan di Puerto Rico tin par di ora aki como turista…

ORANJESTAD(AAN): Un caso hopi serio a keda registra Diaranzon mainta riba caminda di Boulevard, un poco panort di Fisherman’s Huts.

Un famia cu a yega Aruba Diaranzon mainta cu barco crusero, a aplica pa bay core rond di e isla den e tipo di vehiculo conoci como “UTV”, esta un vehiculo 4×4 off-road den cual tin asiento di 2 te cu 6 pasahero, y cu ta mira hopi di nan riba caminda na Aruba.

Algun pais ta prohibi pa UTV core riba caminda, y ta exigi pa nan core solamente off-road.  Pero na Aruba, nan ta wordo considera como un vehiculo di mas cu 2 wiel, y cu un plachi di number, nan ta core tur caminda.

E famia ta procedente di Puerto Rico, y nan a huur un UTV pa core aden.  Algun hende na Aruba ainda ta yama e vehiculonan aki como “Buggy”.

E ACCIDENT:

Coriendo riba e caminda di Ritz-Carlton Resort bayendo panort rumbo Malmok, un poco panort di Fisherman’s Huts diripiente algo a bay robez.

E vehiculo UTV a hala inespera na su banda robez di caminda, y a bay dal frontal contra un Minivan color blanco cu tabata bin di direccion contrario.  E choque tabata na altura di L.G. Smith Boulevard 472.  E Minivan tambe ta un V-Auto, y tabata wordo maneha pa turistanan, den cual tin nan yiunan sinta patras.

E impacto aki alrededor di 10:45 am, tabata violento, y tanto e UTV como tambe e Minivan a keda cu daño material inmenso.  Den e UTV tabatin un mucha homber di apenas 5 aña di edad.  Door di e impacto, su curpa a move violentamente, y den esaki full e pida abao di bao di su rudia a keda amputa.

E prome personanan cu a yega na e accident, a bin topa cu e situacion hororoso.  Mesora yamadanan a cuminza drenta na tanto Central di Polis telefon 100, como tambe na Centro di Alarma 911.

Diferente unidad di Polis, incluyendo Polis di Noord, Strandpolitie, Polisnan Motoriza, y Polis di Trafico a cuminza mobiliza pa e area.  Y net e momento ey, e unidadnan di Ambulans tabata ocupa cu trabao, y nan no por a mobiliza mesora pa e lugar.

RESCATE COMPLETO:

Un funcionario di Departamento di Transporte Publico (DTP) cu a pasa eybanda, a stop di auto y a baha duna asistencia mesora.  E tin background di First Aid, y ta voluntario di Cruz Cora Aruba.  E ta uno cu mesora a mira e situacion di e mucha, y a cuminza usa tactica y un tourniquet pa wanta e bil di e mucha, pa asina restringi fluho di sanger di e adernan.  E pia a kita full, pues mester a busca forma pa stop e sangramento.

Mientras cu tabata wardando Ambulans, unidadnan di Cuerpo di Bombero, y tambe Rapid Responder a yega cu rapidez na e lugar.  Polis a cera e caminda, pa asina no stroba e trabao di rescate.

E pia di e mucha a wordo haya, y Polisnan a logra haya un ice-jug, den cual a pone e pia aden.  Tambe a haya un saco di ijs, cu cual nan a benta esaki riba dje.  En espera pa e mucha wordo rescata door di Ambulans y Paramediconan, Polisnan mes adelanta a hinca e jug den nan patruya, y a sali cune rumbo pa Servicio di Emergencia na Dr. Horacio Oduber Hospital pa busca forma pa Specialista por prepara e pia, si acaso tin di bay pega esaki bek.

Hospital a pone Specialistanan y demas docternan di trauma riba standby sperando riba e heridonan.

Despues cu e demas Ambulansnan a bira liber, en total 3 unidad a yega na e lugar di accident.

Ora cu finalmente tabatin e pacient basta stabil, a pone den Ambulans y cu urgencia a sali pa Hospital.  Aki mesora e mucha Puertoriqueño a wordo hinca den Sala di Operacion, pa asina check e embergadura di e amputacion, e heridanan, y e daño na musculo y nervionan.

Sinembargo a bin nota cu e daño na tur e partinan aki, incluyendo e fractura complica di e weso, a deduci cu ta imposible pa pega e pia bek.  A keda nan nada otro pa bay over na haci e amputacion lo mihor posible pa minimaliza mas daño.

Un dama cu tambe tabata den e accident, a keda herida y a bay cu Ambulans pa Hospital. Pero su condicion ta stabil.

Na e lugar di accident, por a nota presencia di Hefenan halto di Polis, tambe Hefe di Ambulance, y Hefe di Cuerpo di Bombero.

- Advertisement -

DUNA COMENTARIO

Please enter your comment!
Please enter your name here