Home General “Ningun momento mi a instrui mi yiunan pa nan bay horta”

“Ningun momento mi a instrui mi yiunan pa nan bay horta”

382
0
SHARE
- Advertisement -

Declaracion di e mama Vivian Kock

ORANJESTAD (AAN): “Ningun momento mi a bay Win Lee Supermarket y instrui mi yiunan pa nan bay horta!”  Esey ta loke e dama Vivian Kock a subraya Diahuebs atardi den un entrevista cu DIARIO.

E ta haya cu ta necesario pa esey wordo aclarea pa pueblo completo compronde!  Autoridad mes a wordo informa di tur esaki, y nan a mira e video pa comproba esey.  Vivian y su pareha tabata haciendo compras den e negoshi, y nan no ta compronde di con nan yiu den un ‘locura’ a pasa man pa e Glacial y purba bay cune.

Segun señora Kock, nan a pleita contra gerencia di e Supermarket pasobra nan a keda disgusta con e comerciantenan Chines a atende e muchanan.  Tabatin yen otro forma cu gerencia por a atende e asunto aki.

E pareha tabata haciendo compras y tabata den e parti patras cerca di e Carniceria, ora cu nan a tende nan yiu grita pa auxilio.

Mesora nan a core cana bay dilanti na e Cashier, y aki nan a bin topa cu e comerciante cu su man grandi ta teniendo e braza abao di nan yiu na un forma masha duro mes.  Mesun momento e yiu homber di e comerciante tabatin nan yiu teni den un “choke-hold”, casi horcando e mucha.

Ey ta unda e Tata di e mucha su fuse a bula.  Ningun mama of tata lo no aproba pa otro hende ta haci esaki cu nan yiu.  Nan ta haya cu e comerciante por a sikiera acerca famia y bisa nan cu “boso yiu a coy algo”.  Pero e comerciante a dicidi riba su mes pa pasa man y golpia nan yiu y e otro tabata chocando e pober mucha.

Loke a spanta Vivian Kock y su pareha tambe ta cu e mucha aki apenas algun siman pasa a haci cirugia na su boca.  Ainda e tin pida cosi paden di su wang.  Y nan tabata mira cu e chocamento tabata afectando e operacion di Docter.

“Mi ta coregi tur esnan cu a huzga nos, cu ningun momento ni ami como Mama, ni mi pareha, ni mi yiunan a drenta pa horta!  Esaki ta algo cu nos no ta haci.”  El a insisti cu ningun momento nan a drenta y manda nan yiu bay horta.   “Pues e storianan inventa riba Facebook no ta basa riba berdad.”

E ta opina cu e comerciante por a djis hala atencion di e mayornan encuanto loke nan yiu a haci.  “Claro mi lo a habri mi cartera y paga pa e botter di Glacial, y despues zundra y coregi mi yiu,” Kock a indica.  Pero e no ta aproba cu e comerciante Chines a hinca ley den su mesun man.

E motibo pakico nan a reacciona rabia contra e comerciantenan, ta e trato inhusto cu nan a haci cu nan yiu, y posible daño na un cirugia existente na un banda di su cara.

Segun Vivian Kock, e difamacion cu nan a haci cune riba Facebook ta hacie bira mas fuerte pa e lanta bek y sigui cu frenta na laira.

“Hendenan cu a huzgami riba Facebook, no a kibrami, pero mas bien a ponemi bira mas fuerte,” el a declara.  E sa cu su yiunan a siña tambe di loke nan a haci, y e ta agradecido na e cantidad di hende cu a duna su yiunan conseho.  “Esnan cu a duna mi yiunan conseho, mi kier bisa boso masha danki, mi ta hopi agradecido na esey.  Mi yiu mes ta pensando, cu kizas ta un locura a pasa den su cabez y el a pasa man pa e botter di Glacial.”

Vivian Kock ta subraya, cu e no a defende hortamento di Glacial.  El a defende su yiunan contra e trato inhusto cu e comerciante Chines a haci paden di e Supermarket.  Esaki tabata hopi prome cu e video pafo a wordo graba.

“Mi no ta contento cu loke a pasa, ni kico nan a haci.  Pero tabatin otro manera pa e Chines bin papia cu nos, y sigur e ora e lo no a escala asina,” Vivian a splica.

Su pareha mes no a dal e Comerciante na comienzo.  “Mi no a hacie, pasobra mi no sa e momento ey kende ta fout,” e pareha a indica.  Pero pafo si e ta admiti di a dal e comerciante, pero el a haci esey pa purba stop e pelea.

E pareha no ta contento con e comerciante a abusa di nan yiunan chikito.  E tabata bira razo ora di mira con e comerciante Chines ta manda mokete riba e muchanan, comosifuera ta homber grandi nan ta.

Vivian Kock a bisa cu su consenshi ta limpi.  El a bisa na final, cu e ta bendiciona tur hende cu a lanza critica, tambe bendicion na tur esnan cu a duna critica positivo.  “Mi ta bay dilanti, y mi yiunan ta sigui bay dilanti.”

 

- Advertisement -

DUNA COMENTARIO

Please enter your comment!
Please enter your name here