Home Gobierno “Nos no kier biba den un Aruba unda abuso ta tuma lugar!”

“Nos no kier biba den un Aruba unda abuso ta tuma lugar!”

78
0
SHARE
- Advertisement -

Aruba mester ta un diamante di balor di bida den hogar y famia

ORANJESTAD (AAN) – Basta pregunta a surgi for di prensa, den conferencia di prensa cu Minister Glenbert Croes, relaciona cu e plan di crisis social, relaciona e biaha aki cu e asesinato di un dama door di maltrato domestico cuminzando siman.

A puntra tocante e fondonan pa desaroya e plan aki y kico mas e ta pensa cu gobierno y su partnernan concerni por haci pa reduci e problema di violencia domestico.

E mandatario a menciona cu e fondonan ta disponible y a indica tambe cu tin un preocupacion cu na dado momento e fondonan designa y autoriza pa Parlamento, mester wordo poni bao subsidieverordening pa wordo supervisa pa e instancia concerni pa controla e fondonan di subsidio, of sake for di e subsidieverordening pa haci mas agil y facil, dentro di un marco di cooperacion entre gobierno y departamento di finanzas, fundacionnan y Sociale Zaken pa tur esnan envolvi den e plan di crisis social haya nan fondonan.

E fondonan ta hopi amplio, e dignatario a indica, y a señala cu e esencia di plan di crisis social ta cu gobierno ta bay purba di atende tempran e señalnan di alerta, y aki ta unda e “national meld punt” ta importante.

Esaki ta nifica cu e comunidad ta alerta pa meld ora cu nota cu den famia of den vecindario, of un hende cu ta mira algo sospechoso, pa señala esaki tempran.

E mandatario a bolbe pone acento cu e esencia di henter e plan di crisis social ta pa preveni y interveni tempran pa casonan manera di e dos muchanan Anastasia of e caso di e dama cu ta den noticia awor, no sosode.

E mandatario ta dispuesto pa trece un reunion entre Sociale Zaken, Fundacion Hende Muher den Dificultad y prensa como cu e instancianan menciona ta e expertonan, esnan encarga cu e parti tecnico di kico nan ta bay haci pa contraresta e problema.

Minister Glenbert Croes tin tur su confianza den e Departamento di Asunto Social, den e Fundacion Hende Muher den Dificultad y tur otro instancia cu ta coopera, entre nan Cuerpo Policial cu ta un partner masha importante den henter e aspecto aki, mescos cu Ministerio Publico y Departamento di Salud Publico y Buro Sostenemi como meld punt.

Akinan lo yega tur e melding di henter e networking pa elimina tur lista di spera na e diferente instancia cu tin casonan cu no por a wordo atendi ainda.

E mandatario a señala cu entre e momento di meld y ora e instancianan actua si no tin e experticia ta crea un perspectiva falso riba solucion di e problema.

E crisis plan social ta net pa elimina esaki y hopi fondo a wordo poni pa e aña aki y aña venidero, pero mester percura pa e fondonan yega na e instancianan pa caba. Minister Glenbert Croes a expresa cu nan no por keda tratando di lucha cu bareranan burocratico. E caminda burocratico por ta importante pa eherce control pero hopi biaha e ta bira un muraya cu ta impedi logra locual mester logra, ora cu ta urgente y unda mester actua lihe pa no mira mas caso manera di e dos criaturanan ni di e esun di e señora cu lamentablemente a perde su bida.

“Nos mester bira un pueblo y comunidad conciente cu loke ta abuso den hogarnan, violencia domestico, abuso di mucha, di nos grandinan, di hende muher y en general no por wordo tolera. Nos no kier biba den un Aruba unda abuso ta tuma lugar y ta den nos man pa dicidi cu e Aruba cu nos kier mester ta un diamante, un joya den e balor di bida di un famia y un hogar”, e dignatario a expresa.

 

- Advertisement -

DUNA COMENTARIO

Please enter your comment!
Please enter your name here