Home General Nos no mester warda te bida di hende bira un drama pa...

Nos no mester warda te bida di hende bira un drama pa duna un stap dilanti y yude

269
0
SHARE
- Advertisement -

Pader Jairo Maduro den entiero di Ski:

ORANJESTAD (AAN) – Pastor Jairo Maduro a oficia e parti religioso di e acto di despedida di e conocido Ski, cu a haya un entiero digno unda su condicion di ser humano a ricibi respet di tur e personanan cu a colabora y cu tabata presente.

Pastor Jairo a elabora riba situacion den bida di hende, y a expresa cu ora hopi biaha un bida den su gran contenido, ta expone un drama, cu no ta loke Dios kier pa hende. E ora nos ta puntra nos mes: ta kico ta pasando cu nos mes?

E Sacerdote a cita un pasahe biblico di e Buki di Lamentacion di profeta Jeremias. E ta un palabra di Dios cu ta consisti di kehamento: un kehamento cu kizas nos ruman Hubert a sintie den su bida:  “Paz a bay foi mi. Mi a lubida kico tabata felicidad. Hasta mi a yega di pensa cu mi speranza firme den Señor a muri. Mi ta corda riba mi tristeza y soledad”.

Pader Jairo Maduro a sigui bisa cu e amargura den bida di hende ta skirbi tambe den Palabra di Dios como sucesonan, y e ta conta nos tambe historia di hende y su relacion cu Dios.

Pader Jairo a expresa cu salida di Hubert hala atencion, y el a puntra di con esaki? “Su salida a bira noticia. Di con su salida a bira noticia, awo? E ora ey nos mester puntra nos mes y kizas haci un revision di consenshi pa mira na unda nos ta para un cu otro. Nos no mester warda pa e hende su bida yega na un drama pa nos duna stap nos dilanti”.

Pader Jairo a agrega cu claro cu esaki ta bon cu nos a duna stapnan padilanti y mustra solidaridad cu e famia, tur esaki ta fantastico y cu nos kier a duna homenahe na un hende cu a bay foi di nos; esey ta duna forza na e momentonan aki.

“Pero prome cu esey, tambe e Palabra di Dios ta bin den nos direccion y hopi biaha ta reclama na nos tambe cu nos mester duna stap padilanti pa mustra atencion cu otro, ora e hende ta na bida”, Pader Jairo a acentua.

El a añadi cu nos ta biba den un sociedad cu a cambia hopi y cu e Palabra di Dios ta box cu nos forma di pensa. “No mester laga cos pasa pa nos tuma un accion profundo; si no, nos mester tuma un accion profundo tur dia” e sacerdote a expresa.

El a agrega cu nos mester di tuma accion individual y ta un mihor hende cada dia, pa cada dia nos gradici Dios y pa nos pusha padilanti y esun cu a cay pa nos trek e trece ariba cu palabranan di curashi y di animo. Pesey, Palabra di Dios, ta reclama nos.

“Nos ruman Hubert a pasa porta scur di morto, pa biba den plenitud loke realmente ta bida y contempla y contempla loke e Palabra di Dios ta priminti nos, ora nos ta sali for di akinan”, Pastor Jairo a bisa.

E sacerdote a sigui bisando cu a pone nos ruman den man di Dios di bondad y misericordia, pa e goza di promesanan grandi, pasobra e Palabra di Dios ta un buki di promesanan cu mester alcanza cada un di nos y mester inspira nos tambe pa tur dia haci bon cu otro pa asina nos bira merecedo di e promesanan cu Dios ta ofrece nos.

 

 

 

- Advertisement -

DUNA COMENTARIO

Please enter your comment!
Please enter your name here