Pa tur dama of esnan cu ta wordo confronta cu violencia den famia, por fabor no keda keto

    248
    0
    SHARE
    - Advertisement -

    Fundacion pa Hende Muher den Dificultad

    ORANJESTAD (AAN): Suzette Kock, presidente di Fundacion pa Hende Muher den Dificultad a yama un conferencia di prensa urgente relaciona cu lamentable di violencia domestico, na unda un dama a fayece.

    Na prome lugar, e kier a extende nan mas profundo condolencia na famia di Sra. Anuskha Tromp, y el a expresa cu ta momentonan hopi dificil pa nan pa varios motibo, pasobra nan tin hopi tempo ta papiando riba situacion di violencia domestico, con grave nan ta pensa cu e situacion ta y cu nan ta kere cu e situacion ta mas grandi di loke ta pensa cu e ta.

    Na December caba, nan a haya nan mes, moralmente obliga pa para pa evento di recaudacion di fondo, na momento cu a perde dos criatura, na e mesun un man di violencia domestico y aworaki nan ta haya caso na unda un dama ta bira e victima di violencia domestico.

    Loke e fundacion por bisa di e caso ta, pa con duro cu e lo zona y nan ta avisa esaki, e no ta un sorpresa pa Fundacion pa Hende Muher den Dificultad, cu un otro victima ta cay. Apesar di tur locual cu Fundacion ta haci pa trece e noticia den pueblo, duna informacion, specialmente riba nan pagina di Facebook, cu a bira e medio, caminda cu e informacion aki ta wordo pasa.

    Sra. Kock tambe a indica cu medionan di prensa tambe cu a duna hopi interes na tur caso di violencia domestico. El a bisa cu prensa a publica e casonan y a atende nan, pero apesar di tur esey, awe un biaha mas tin un otro caso fatal.

    El a bisa cu mester compronde cu e señora aki nunca a acerca e fundacion y te na unda cu nan tin informacion, e no a haci un denuncia tampoco. Esaki por cambia mientras cu e investigacion ta tumando lugar den e caso aki. Pero e señora no a acerca e fundacion pa ayudo.

    Nan a lesa algun comentario cu a bisa, ‘unda Fundacion pa Hende Muhe den Dificultad a keda’, y Sra. Kock a bisa cu e fundacion ta situa na mesun adres di semper, Primavera 1B. El a enfatiza cu Fundacion pa Hende Muher den Dificultad no ta obliga ningun hende pa yega cerca nan. E persona mester yega cerca nan boluntariamente.

    Fundacion pa Hende Muher den Dificultad ta keda pone informacionnan den comunidad cu UN GOLPI ya caba ta di mas. Un insulto ya caba ta di mas, pasobra hasta esey ta parti di violencia. No ta solamente golpi! Pa ora cu yega na golpi, hopi cos a pasa caba den un relacion. E ta hopi dificil pa e fundacion, pasobra cu pa un of otro motibo e señora aki, por ta no a scucha nan informacion of no a haya cu e informacion a motiv’e pa yega cerca nan. Esaki ta bay stimula e fundacion pa intensifica e manera cu nan ta trece informacionnan den comunidad.

    Pa tur dama of esnan cu ta wordo confronta cu violencia den famia, por fabor no keda keto! E culpabel di mas grandi ta silencio. Ora cu ta bisa un posibel victima, ‘a bo mes ta gusta’, of ta pone cualkier stigma riba dje, bo ta dun’e miedo pa busca ayudo. Al contrario, mester yuda nan kibra e silencio.

    Sra. Kock a bisa cu cualkier hende cu sa di un caso, yama polis, nan ta e prome yama pa atende cu casonan asina. No warda te ora cu cosnan mester yega asina na un punto asina aki, cu tin cu bolbe perde un ser humano na man di violencia domestico. Ban yuda kibra e silencio, silencio ta mortal! El a wordo mustra na December y e ta wordo mustra un atrobe aworaki.

    Sra. Magali Maduro, coordinador pa Fundacion pa Hende Muher den Dificultad, a bisa cu nan ta lamenta di mas profundo di nan curazon cu mainta tempran e dia a habri cu un noticia asina tristo, cu a conmove hopi hende aki na Aruba, cu a conmove hopi hogar y ta conmoviendo nos islanan di Caribe.

    El a indica cu el a haya hopi reaccion riba e caso aki y hopi hende ta lamenta cu el a sosode. E pregunta cu ta surgi den momentonan aki ta, cuanto mas. Cuanto mas victima nos mester pa nos por realiza cu nos sociedad ta bayendo den un caminda negativo. Y si nos no, conhuntamente dicidi pa haci algo na esaki, sino conhuntamente bisa cu nos no ta acepta, ni tolera den nos sociedad, e tipo di abusonan aki, e ora nos por bien lubida, pasobra mas y mas e violencia ta manifesta su mes den nos sociedad. Ta di lamenta masha hopi mes cu awemainta dos yiu ta realiza cu nan mama no tey mas, nietonan cu e mama no lo mira mas.

    Awe hendenan muher ta realizando cu si nan no sali for di e situacion aki, kizas nan tambe ta un victima, kizas nan tambe lo caba como un estadistica mas.

    Sra. Maduro a indica cu den horanan di mainta nan yama mesora pa Minister di Asuntonan Social, Sr. Glenbert Croes, kende mesora a mustra cu e kier atencion pa e caso aki. Prome Minister, Sra Evelyn Wever-Croes tambe a tuma contacto cu nan. E fundacion, conhuntamente cu comunidad di Aruba, ta bay traha un mas duro, riba loke nan haciendo caba.

    E fundacion ta purba di ta den media constantemente, concientiza hendenan muher y nan famia, cu esaki ta un tema cu no mester sconde mas, ta un tema cu mester papia rond di dje. Sra. Maduro a bisa cu hopi hende a yama y tambe doñonan di trabao, cu awe e señora no a aparece, kiermen tin concientizacion ta tumando lugar, pero e no sa si esaki ta suficiente.

    - Advertisement -

    DUNA COMENTARIO

    Please enter your comment!
    Please enter your name here