Home Parlamento Palabranan di animo y hopi exito na tur nos becadonan

Palabranan di animo y hopi exito na tur nos becadonan

37
0
SHARE
- Advertisement -

Parlamentario Jennifer Arends-Reyes

ORANJESTAD: —Segun sra Jennifer Arends-Reyes parlamentario di AVP, e dianan aki ta marca dianan hopi importante y cu yen di emocion den cada cas di famia cu tin un yiu of ruman cu a dicidi di sigui nan estudio den exterior. Hopi di nos studiantenan ta bay laga nan famia atras y ta bay busca un mihor futuro door di sigui un estudio.

Esaki sigur ta un mentalidad sumamente corecto y cu mester sigui stimula. Na momento cu bo yega un pais cu ta un pais grandi y desconoci e por ta algo impresionante. Pesey ta bon semper pa nos studiantenan ta bon prepara mentalmente pa e cambio drastico aki, caminda cu tur e balornan cu bo mayornan y grandinan a enculca den bo tin cu bin bek dilanti.

Momentonan lo presenta unda cu bo por scoge entre e caminda corecto of esun cu por desvia bo na yega bo metanan. Awor aki e etapa crucial den bida di cada studiante ta cuminsa unda cu mester tin un comunicacion abierto cu mayornan pa asina informa nan di tur locual ta experiencia sea bon of menos bon.

“Studiantenan, mi mensahe na boso ta pa bay cu mente habri caminda cu bo lo kier siña di e cultura nobo y tambe principalmente practica papia e idioma. Semper rondona bo mes di personanan cu ta positivo y cu tin mesun meta cu bo.

Semper keda cu e sentimento di hermandad pa otro, ora cu bo ta wak un amigo di bo ta bay den un caminda cu no ta corecto, pasobra tentacion lo tin hopi, como un bon amigo of conocir papia cun’e y sigui motiv’e y yuda otro pa yega na boso metanan. Cuida bo salud y hiba un bida saludabel y responsabel.

E temporada di studiante mester ta uno bunita y memorabel den bo bida, naturalmente cu scogencianan huicioso y nada di mas. Hasi uzo di e recursonan y informacionanan cu bo ta haya. No keda cu pregunta, puntra bo derechonan y obligacionnan. Nunca tuma decisionnan grandi sin consulta cu bo mayornan of mentornan. Tur tey pa yudabo den bo formacion como un adulto profesional”.

E scogencia di un estudio mester ta algo cu e studiante mester tin afinidad pe. Percura pa a ricibi bon y suficiente informacion di e cuponan di trabou den e ramo aki prome cu inverti den un estudio den exterior. Na final di dia tur studiante cu ta scoge pa sigui studia sea ta na Aruba of den exterior e ta un inversion sumamente costoso y e deseo ta pa logra haya un trabou na momento cu termina e estudio cu exito.

Sra Arends-Reyes ta sigui amplia, “Un otro punto cu mi persona ta haya valido ta cu hopi departamentonan, organisacionan y companianan di sector priva lo mester por habri porta pa mas “stagiaires” pa asina nos studiantenan por haya experiencia den nan futuro trabou den nos sector laboral”.

Sra. Arends-Reyes ta di opinion cu na momento cu nos yiunan di tera termina nan estudio exitosamente lo ta bon pa crea mas incentiva pa trece nan cas bek y pa asina nan contribui cu nan conocimento nobo pa e desaroyo di nos pais.

Aruba lo mester tuma nan man habri bek, si nan lo ta desea di bin bek pa yuda e.o. cu e economia di conocimento di nos pais y pa bin bek serca nan famia na nan pais natal. Sra Arends-Reyes ta finalisa su mensahe “Cu determinacion, fe y perseverancia tur nos studiantenan lo logra nan meta cu exito! Cu nos creador drama su bendicion ricamente ariba cada un di nan y guia nan den e reto nobo aki!”

 

- Advertisement -

DUNA COMENTARIO

Please enter your comment!
Please enter your name here