Home Politica Partido AVP ta anuncia Cumbre ’18 dia 2 di september den Renaissance...

Partido AVP ta anuncia Cumbre ’18 dia 2 di september den Renaissance Convention Center

52
0
SHARE
- Advertisement -

ORANJESTAD  (AAN) – Mike Eman, lider di partido AVP, acompaña pa Richard Arenda y Ichelle Simon, a tene un conferencia di prensa unda ta splica di e cumbre cu ta tuma lugar otro siman, dia 2 di september den Renainssance Convention Center. Despues di eleccion di aña pasa, unda partido AVP a resulta e partido mas grandi, AVP y su dirigentenan den su totalidad a haci un compromiso cu pueblo.

Eman: “E compromiso aki tabata pa traha riba e retonan nobo cu a bin hunto cu e posicion nobo cu AVP a haya desde 22 di september 2017.”

Eman a splica cu pa AVP semper ta importante, sea cu e ta den gobierno of den oposicion pa haci e tarea cu e tin cu un dedicacion completo y cu e devocion pa sirbi comunidad lo miho posibel. “Ta den e cuadra ey tambe historia di partido a demostra cu ora nos ta den oposicion, nos a carga esaki cu dos meta importante.

Nan ta cumpli cu e tarea den Parlamento, loke ta tumando lugar awor aki tambe debidamente. Nos Parlamentarionan ta percura pa bos di pueblo resona y e mandato cu AVP a haya resona den Parlamento. Tambe pa controla gobierno y na mes momento prepara nos mes pa un miho gobernacion.

Partido ta cumpliendo cu esaki tambe.” Eman a sigui splica cu partido a reflexiona riba resultado di eleccion y e mandato cu partido a haya di comunidad. Algo cu partido ta cumpli cu ne cu un serenidad grandi y cu masha hopi humildad. Pasobra ora pueblo papia mester scucha cu atencion.

‘Scucha, pensa y trece cambio’ semper ta parti di pensamento di partido y ta e forma con partido ta aserca e bos di pueblo. Eman a bisa cu esey ta loke AVP a bin ta haciendo durante e ultimo lunanan desde eleccion.

“Nos a enfoca riba e organisacion interno di partido y con ta prepara miho pa un siguiente eleccion y un siguiente gobernacion y pa ta prepara pa e rol cu nos tin na e momentonan aki.”

Lider di partido a haci un yamada na henter comunidad pa atende Cumbre ’18 ya cu esaki ta un momento culminante di e prome fase di reflexion, preparacion, fortificacion y  modernisacion di partido.

Henter Conseho di Partido AVP, henter fraccion, directiva di partido, instituto y fundacionnan ta participa na e cumbre aki.

Richard Arends, miembro di Parlamento pa partido AVP, a splica mas riba contenido di Cumbre’18.  “Manera Miek Eman a bisa caba, preparacion ta esencial pa partido AVP, e ta e clave di nos maneho, e clave di mehoracion y ta e clave pa hiba Aruba dilanti pa trece prosperidad. E ta e liña cora di maneho di Gabinetenan Mike Eman I y II.  Awor aki nos ta preparando nos mes pa un siguiente gobernacion, pa por asumi e responsabilidad ora nos haya e tarea aki un bes mas.”Arends a enfoca riba Cumbre’18 splicando cu esaki ta bay tin e mes un formato cu 1000Voz cu tabata un evento participativo unda a fiha e programa di partido.

Mil persona por a contribui cu nan idea, pensamento y consehonan cu despues a wordo tuma como guia den e programa di partido. “Esaki ta algo esencial na momento cu nos ta fiha nos maneho y nos plannan cu participacion di e cuidadano pa wak unda e kier mira Aruba den futuro y con AVP por contribui na esaki.”

Ichelle Simon, miembro di Fundacion Digna Lacle-Herrera, a bisa cu partido ta cla pa Cumbre’18. “Partido AVP semper a duna muestra di su vision y su mision. Esaki a keda demostra durante e ultimo ocho añanan di gobernacion. Awor den oposicion partido ta sigui traha den e miho forma posibel pa cumpli cu su tarea. Na e Cumbre’18 comunidad di Aruba ta invita pa bin hunto pa tende kico ta e vision y mision di partido AVP pa e añanan nos dilanti. ”

Simon a splica cu Cumbre’18 ta un oportunidad grandi cu ta wordo brinda na tur hende pa bin reflexiona hunto cu partido, dialoga y participa pa asina mira kico ta e plannan cu partido AVP tin pa futuro. Lider di AVP Mike Eman, Richard Arends y Ichelle Simon a haci un yamada fuerte pa tur hende bin participa na Cumbre ’18 pa asina ta al tanto di loke partido tin riba agenda.

 

 

- Advertisement -

DUNA COMENTARIO

Please enter your comment!
Please enter your name here