Home Gobierno Pashentnan por evalua servicio na docter di cas cuminzando cu e recepcionista

Pashentnan por evalua servicio na docter di cas cuminzando cu e recepcionista

82
0
SHARE
- Advertisement -

Aplicacion a keda cla y pronto lo bira digital:

ORANJESTAD (AAN) – Minister di Turismo, Salubridad Publico y Deporte, Dangui Oduber, tambe a hiba palabra den conferencia di prensa semanal di gobierno, Dialuna mainta den sala di prensa di Bestuurskantoor.

Minister Oduber a actualiza informacion tocante un decision cu el a anuncia algun siman atras, pa duna e comunidad cu ta haya servicio di AZV, pa duna un rating cu score na e servicio cu e docternan di cas ta brinda nos pueblo.

Durante e ultimo lunanan e proyecto aki a keda desaroya, y den conferencia di prensa a haci e presentacion aki. Esaki ta coordina cu AZV, e dignatario a subraya.

Awe e director nobo di AZV Ruben Goedhoop ta asumi oficialmente su cargo, y ya caba e aplicacion aki a wordo discuti cune y cu drs. Anko Ringeling door di e mandatario.

Asina a yega na un serie di pregunta y riba nan e asegurado ta bay uza e aplicacion tocante nan experiencia den consulta cu docter di cas. Esaki ta conta no pa e docter so pero tambe pa su asistente, segun e dignatario a indica.

E mandatario a subraya cu e kehonan na AZV ta drenta cu mas frecuencia y basa riba esey a bin cu dicho aplicacion.

Den dje tin diestres pregunta di cual cada un ta duna un rating di cinco strea, bao di cada strea tin un splicacion kico cada un ta nifica.

Importante den esaki ta, e mandatario a subraya, pa bay midi e servicio cu docternan di cas ta duna.

“Kiermen, comunidad ta bay haya pa prome biaha den historia, despues di un bishita cerca e docter di cas, pa e mes duna un rating tocante e manera con e ta wordo trata” Minister Dangui Oduber a indica.

El a menciona cu for di e momento cu e pacient yama pa pidi un cita, ora cu e ta wordo ricibi pa e recepcionista y e ta sinta warda te ora e mester wordo atendi pa e doctor e aplicacion ta conta. E trato di e docter tambe ta haya un rating y tambe di e recepcionista.

E dignatario a subraya cu e score aki ta bay wordo evalua periodicamente, door di AZV, y si en caso docternan no ta score manera desea, lo sinta cu e docternan concerni pa wak con por mehora e servicio.

E dignatario a reitera cu e meta final di e aplicacion aki ta mehora e servicio cu docternan di cas ta duna comunidad y a agrega cu su vision como minister di Salubridad ta pa mehora no solamente e servicio pero cuido den su totalidad. Esaki ta algo innovative cu nunca antes a tuma lugar na Aruba, segun e titular.

El a agrega cu na Hospital tin un formulario cu tur pashent mester yena na momento cu e ta haya salida, pa duna un indicacion con e grado di servicio ta y con nan a wordo trata na momento cu nan tabata hospitaliza.

Den e caso di docternan di cas ta mas innovativo pasobra e ta bay wordo haci digitalmente, y e lo wordo poni riba website di AZV. Pronto e lo wordo lanza oficialmente y e comunidad por cuminza haci uso di e aplicacion aki.

 

- Advertisement -

DUNA COMENTARIO

Please enter your comment!
Please enter your name here