Home General Personal di SVGA a completa trayecto di capacitacion profesional

Personal di SVGA a completa trayecto di capacitacion profesional

13
0
SHARE
- Advertisement -

ORANJESTAD (AAN): Cu hopi motivacion y cla pa pone den practica locual nan a siña, personal di SVGA a completa un trayecto den colaboracion cu Departamento di Asunto Social (DAS). Den presencia di directora di SVGA señora Els van Hommelen, a tuma luga e entregamento di certificado na e participantenan cu a completa e trayecto.

Trayecto:

Den cuadro di stimula capacitacion profesional, personal di SVGA consistiendo di; Cas Sjabururi, Briyo Di Solo, Man na Obra, Grupo Social Pedagogico, Pasa Dia Bibito Pin, Algemeen Beheer, a participa na un trayecto di siña consistiendo di diferente tayer.

Durante e trayecto a trata temanan di importancia pa desaroyo personal y profesional cu e meta pa stimula coherencia, miho comunicacion y colaboracion den area di trabao.

Den un forma colectivo y interactivo durante 4 sesion a traha pa amplia conocemento, habilidad y cualidad pa cu siguiente temanan:  (*) Cambio, con ta anda cu esaki. (*) Bira mas consciente di patronchi di comportacion pa cu cambio.  (*) Motivacion interno, e importancia di sinti bo contento cu bo trabao.  (*) Duna y ricibi feedback.  (*) Siña y traha hunto den team y e rolnan di “ M.Belbin”.  (*) Ken mi ta como colega.

DAS colaborando cu experticio profesional:

Señora Marianela Haakmeester-Loefstok y señora Madeline Doulabi-Ridderstap profesionalnan specialisa den guia profesionalnan tanto individual, den team y organizacion completo a facilita e trayectonan di siña.

E trayectonan ta enfoca riba siña colectivo, siña colabora, siña construi, cu compasion y confianza pa hunto duna lo miho di cada un den area di trabao pa asina tambe brinda servicio di calidad.

Participantenan tabata hopi satisfecho y a expresa aprecio y gratitud  pa e oportunidad brinda pa  asisti  na e trayecto.

DAS ta motiva trayectonan educativo den cada organizacion y lo sigui haci su mes disponibel pa colabora riba e tereno aki uzando su profesionalnan. Na final DAS kier gradici y duna un pabien na cada un di e participantenan di e trayecto capacitacion profesional.

- Advertisement -

DUNA COMENTARIO

Please enter your comment!
Please enter your name here