Home Comentario Plan di emergencia pa Aruba necesario

Plan di emergencia pa Aruba necesario

28
0
SHARE
- Advertisement -

Explosion catastrofe humanitario Venezuela ta exigi

*Asistencia tecnico Hulandes necesario pa migracion historico

*No por expande crisis financiero cu asistencia pa refugiado

ORANJESTAD (AAN) — “Historia moderno di America Latino no tin un modelo pa atende cu e migracion historico di ciudadanonan desespera di Venezuela. Manera por a spera paisnan cu a brinda yudansa na e prome gruponan di refugiado, awe ta confronta nan propio ciudadanonan cu ta mira nan propio bienestar na peligro. Situacionnan explosivo ta presenta. Aruba tambe mester di un plan di emergencia riba termino corto. Hulanda mester brinda asistencia.” 

Durante ultimo simannan loke instancianan internacional tabata teme, a bira realidad. Habitantenan di paisnan caminda refugiadonan Venezolano tabata busca asistencia, a bira agresivo y a cuminsa defende nan interes propio.

Instancianan internacional ta trata di brinda asistencia den loke nan ta yama un catastrofe humanitario hamas conoci den historia moderno di Latino America.

DIARIO a discuti e situacion cu informantenan cu a indica cu den e proximo dianan, Aruba mester traha un plan di emergencia y pidi asistencia tecnico urgente di Reino pa e migracion historico cu por acelera mientras mas pais kier cera porta pa Venezolanonan.

E embergadura di e situacion, manera nan a presenta na DIARIO, ta sumamente preocupante.

Derechonan internacional di mucha 

Na varios pais, ciudadanonan a cuminsa lanta contra refugiadonan. E motibo ta e leinan internacional cu ta brinda proteccion na cada grupo di refugiado.

Un di e gruponan mas importante ta mucha.

Dia 13 di juli 2018, United Nations High Commissioner for Refugees a firma un acuerdo cu Unesco pa loke ta trata e suerte di muchanan, cu ta forma un grupo grandi di refugiado.

E accionnan directo di Nacionnan Uni ta relaciona cu experencianan na paisnan Latino Americano, cu a cuminsa opone e forma cu nan bida normal a cambia pa por yuda e refugiadonan.

Na Juni 2018 relatonan oficial ta mustra e mal uzo di mucha como trahado. Na Colombia a topa cu miles di mucha trahado bou 15 aña. Entre nan tabatin refugiado Venezolano.

E Derechonan di Mucha ta parti di e exigencianan pa duna yudansa humanitario na mucha y esey ta exigi cumplimento di leynan na interes di mucha.

ILO y labor refugiado

Mercado laboral ta bira e campo di bataya mas grandi. E Organisacion Internacional di Trabou, ILO, na 2017 a trata di traha un inventario di e situacion laboral na Venezuela y loke por a spera.

ILO no a bay Venezuela pasobra e regimen di Maduro no a permiti pa e delegacion papia cu nuebe sindicato y tabata di opinion cu ningun comision por mete den trabou di Gobierno Venezolano.

E situacion di trahadonan na Venezuela a bira un di e motibonan mas grandi pa bay exterior caminda refugiadonan mas y mas ta subi e mercado laboral. Esaki ta crea conflicto cerca trahadonan local cu ta mira nan pan di cada dia na peliger.

For di April 2018 a registra confrontacion violento entre refugiadonan y trahadonan di e paisnan di refugio.

Na Brazil a acepta un plan di ILO pa empleo di refugiadonan y esey a baha e oposicion pa mas migrante drenta Brazil y participa na trabou.

Cuido Medico y vivienda 

E pakete social di refugiadonan ta consisti tambe di e necesidad di cuido medico. E condicion di salud di refugiadonan Venezolano ta malisimo.

Falta di alimento, remedi y condicionnan basico di bida manera higiena personal, a aumenta e indice di maleza cerca refugiadonan cu mester haya cuido medico ora acepta nan entrada na un pais. Esaki no ta pa nan bienestar so pero tambe di e poblacion cu por cera conoci cu enfermedad cu ta resultado di e bida desbalansa na Venezuela.

Pa por yuda den e situacion precario na Colombia. Merca a manda un barco di guera uza como hospital pa por yuda cu cuido medico.

Importante den sobrevivencia ta vivienda, cu conoce scarsedad na mayoria di pais Latino Americano. Barionan ta cambia di structura. Campamento ta aire liber ta bira centro di accion ilegal. Hamber y condicion asocial ta afecta siguridad di ciudadanonan.

Aruba no tin infrastructura pa e situacion 

Tur informacion ta indica cu Aruba no tin infrastructura necesario y mester di asistencia di Reino pa por enfrenta e actual problema. Si kier pa Aruba honra e tratadonan internacional pa refugiadonan, mester di yudansa financiero pero tambe tecnico di Hulanda.

E asistencia na refugiadonan ta cubri un tereno masha grandi. Mester tene na leynan hancra den Derecho Humano.

Cifranan di Aruba ta indica cu 15.9 porciento di e comunidad Arubano ta biba den pobreza. 30 porciento di tur hogar den pobreza, tin mucha.

Aruba mester a introduci medidanan di austeridad enfrente e situacion financiero di e pais y no tin fondonan necesario pa cubri gastonan di refugiadonan.

Segun informantenan, hunto cu Reino Aruba mester traha un Plan di Emergencia pa atende e situacion explosivo di refugiadonan.

Venezuela tur dia conoce problema nobo y mas inkietud. Por spera aumento di refugiadonan cu na forma directo of indirecto ta yega Aruba. Mester actua pa evita un desaster social, cu ya ta presente den silencio.

- Advertisement -

DUNA COMENTARIO

Please enter your comment!
Please enter your name here