Home General Ponemento di trailers pa vivienda sin cu tin “bouw-vergunning” ta contra ley

Ponemento di trailers pa vivienda sin cu tin “bouw-vergunning” ta contra ley

245
0
SHARE
- Advertisement -

ORANJESTAD  (AAN):  Construi un cas of cumpra un cas ta costa un persona hopi placa. Tur e proceso pa cumpra of construi ta tuma su tempo.

Sinembargo, ultimo tempo a cuminza ripara di un fenomeno cual ta e ponemento di trailers pa biba sin ningun tipi di fundeshi, gewoon poni riba bloki. Nan ta wordo poni riba terenonan bashi of banda di un cas construi caba.

Relaciona cu e situacion aki DIARIO a tene un entrevista cu Ing. Gerard Thijsen, di e Departamento di Supervision di DOW, kende a duna di conoce cu esaki ta un practica totalmente ilegal.

El a enfatiza cu DOW tin atencion riba e asunto aki y ya caba varios carta a bay pa e doñonan di e terenonan pa avisa nan cu nan mester kita e trailernan aki.

Si mira bon, e trailernan tin di nan ta te hasta bieu, ta poni riba bloki y nan no ta cumpliendo cu ley. Sigur un bista mahos.

Habitantenan di cierto barionan ta confrontando e situacion aki ya cu un trailer mahos a wordo poni banda di cas, no solamente bahando e balor di nan propiedad, pero haciendo e bista di e bario uno di un calidad inferior.

Thijsen a splica cu tanten cu e construccion ta cumpli cu ley no tin problema, pero e problema ta cuminza ora no ta cumpli cu e ley di construccion vigente na Aruba of no tin un bouw-vergunning aproba pa DOW,

E experto tambe a duna di conoce cu e asunto aki tin cu cana su proceso y ta cuminza mandando cartanan di advertencia y den esaki e minister di infrastructura tambe ta wordo poni na altura. DOW ta duna e mandatario advies y den caso extremo mester bay corte.

E ora, Thijsen, a señala, e doño di e trailer/tereno lo mester bay corte y tur cos lo tin un “eigenkosten”.

Cada caso ta wordo analiza individualmente, a subraya, pasobra por sosode cu ya caba tin un “bouw-vergunning” of ta den proceso pa hay’e. Den caso cu constata cu esey no ta e caso, e carta ta wordo manda na esnan concerni, a bisa.

Tin casonan di trailers cu a wordo poni riba terenonan y cu a haya permiso di e minister anterior. Den casonan asina no por haci mucho cos, pero tog e advies ta bay na e minister actual pa asina cana e proceso cu mester cana, Gerard Thijsen a remarca.

 

 

- Advertisement -

DUNA COMENTARIO

Please enter your comment!
Please enter your name here