Home General Post Aruba a emiti un serie nobo di stampianan cultural

Post Aruba a emiti un serie nobo di stampianan cultural

27
0
SHARE
- Advertisement -

ORANJESTAD (AAN) – Diabierna 31 di Augustus 2018, Post Aruba N.V. a emiti e serie nobo “Stampianan Cultural 2018”.

E serie ta consisti di cuatro (4) stampia balora na 90 cen, 130 cen, 220 cen y 420 cen, cu ta yega na un prijs total di Afl. 8.60. E diseñonan pa e stampia aki ta un creacion di Stan Kuiperi y ta imprimi na Johan Enschedé Security Print.

Dera gay: (90 cen)

E stampia aki ta representa un di e celebracionnan mas principal di e cultura di Aruba, cu ta Dia di San Juan (Dia di San Juan Bautista) riba 24 di Juni. E ta un celebracion antiguo pagano di cosecha nativo, cu e misioneronan catolico a permiti pa continua y cu nan a combina cu e calendario catolico pa asina esaki cay pareu cu e Dia di San Juan.

A lo largo di e siglonan, celebracion di e Dia di San Juan na Aruba a desaroya na un manera unico. E agricultornan tabata montona material di cosecha y nan tabata kima esaki cu hopi ceremonia tanto bispo di 24 di juni como riba e dia di San Juan mes. E cantidad di candela riba e isla completo tabata manera un forma simbolico di purificacion, y como ofrenda na e spiritonan local, pa garantiza e proximo biaha un bon plantacion y cosecha abundante.

Segun e tradicion, na final di Dia di San Juan, nan ta dera un gay bibo den tera, meymey di un espacio den aire liber na unda su cabes so ta keda riba tera. Actualmente, e gay bibo a keda reemplasa pa un gay artificial of, den algun caso, pa un calbas grandi mitad dera den tera.

Durante e Baile di Dera Gay, nan ta selecciona tur e hombernan cu ta carga e nomber di Juan y ta rondona nan pa bailarinanan bisti den e colornan geel, cora y preto. Nan ta dal e prome buelta y ta balia cu e wowonan tapa cu lenso preto, mientras nan ta purba dal e cabes di e gay cu un pida palo largo. Si bo faya tres biaha, un otro candidato ta tuma over. E ganadornan ta ricibi un premio, mayoria bes den forma di un bebida alcoholico.

Dia 24 di juni, e holo di kimamento riba henter e isla ta pone nos recorda e custumbernan bieu cu ainda keto bay ta ser respeta y practica na Aruba.

Aloe: (130 cen)

E diseño ta ilustra un mata jong di aloe di e especie Aloe Vera di Aruba mara na un cinta cora y ta colga boca bou den entrada di un cas na Aruba. E generacion bieu di Aruba ta use como un amuleto di suerte pa e hogar. Nan tabata kere cu e mata di aloe ta evita e energia negativo y ta trece cosnan bon, manera salud, den tur hogar. Aunke cu e tradicion aki no ta existi mas na tur caminda, manera antes, ainda hopi cas na Aruba tin mata di aloe planta na entrada di e cas. Esaki tin e mesun proposito y creencia, cu e mata di aloe tin por lo menos poder fuerte medicinal, cu ta proteha esnan cu ta kere den dje.

Trahe Folclorico (220 cen):

Como referencia na e pasado cultural di Aruba, e muhenan local hopi biaha ta bisti trahenan folclorico di Aruba na ocasion di eventonan di baile, presentacionnan musical, festivalnan culinario y otro eventonan cultural tradicional. Mientras cu e bistinan hancho, cu yen di falchi y multicolor claramente tin un origen Iberico, Centro – y Sur Americano. Atravez di añanan e diseñadornan di Aruba a agrega nan propio toke na e prenda den forma di multiple falchi, colornan briyante y textil imprimi. Tela di catuna ta mas uza, aunke e textilnan mas briyante ta ganando tereno pa logra un efecto riba escenario maximo, ya cu nan ta uza e bisti principalmente pa grupo di baile tradicional, cu ta actua na numeroso ocasion durante eventonan riba henter e isla.

E accesorionan manera lenso na cabes, nek y cintura ta varia pa cada grupo y cada diseño di bisti.

E diseño di e stampia ta representa un bisti folclorico inspira pa e bandera di Aruba. Su fondo ta blou, e tin strepinan geel y color di streanan cora y blanco pa e sjaal cu ta bin acerca.

Cuminda tipico Arubiano (420 cen):

E gastronomia di Aruba ta consecuencia di su posicion geografico den lama Caribe, su cercania den henter e continente Americano y su lazonan cultural historico cu e continente Europeo. Un isla asina chikito, cu tanto biento y solo, por ofrece masha poco pa loke ta un suelo rico, awasero y espacio agricola. Pues, a lo largo di siglonan e poblacion a bay lama cu ta conoci pa ta un fuente rico na alimento cu proteina, na unda e awa ta ofrece un abundancia di hopi tipo di pisca pa come.

Esaki a haci cu e plato di “pisca di dia” di Aruba, a bira un di e mas bieunan y esun local faborito,  apesar di e presencia di tanto plato varia di diferente cultura. E diseño particular di e stampia culinario ta mustra un cuminda abundante cu Lutjanus Purpureus na grill, e famoso Red Snapper di Caribe. Ta pisca e pisca cora aki por lo general den e awanan ey mes rond di e isla.

Nan ta sirbi e plato colorido den un tayo simpel pero grandi, loke tambe ta un placer pa e wowo. E pisca na grill, cu un tiki lamunchi primi riba dje, ta hunto cu otro porcion tradicional manera un pida funchi, cu ta un alimento local cu ta consisti di harina geel, awa y salo cu tambe hopi biaha nan ta hasa y pan bati, un mansa di harina geel, harina blanco, baking powder, sucu, salo y awa riba casuela y cu bo ta topa den mayoria mesa na Aruba.

Dependiendo di e gusto, nan por substitui e porcionnan di funchi y pan bati tambe pa aros blanco y batata machica (pure). Pero e plato rico na proteina y zetmeel (fecula) ta completo solamente si bo ta sirbie cu un sabroso saus crioyo (autentico) traha basicamente di tomati hasa, siboyo, vinagre y salo, algun pida banana hasa y un salada di berdura saludable cu tomati, lechuga, bonchi y wortel, tur cu un tiki pica di papaya local. Bon probecho!

E serie di stampianan aki ta obtenibel na e diferente oficinanan di Post Aruba, respectivamente na Oranjestad, San Nicolas y Sta. Cruz. Pa mas informacion tocante e “Stampianan Cultural 2018” por tuma contacto cu Departamento Filatelico di Post Aruba N.V.

 

- Advertisement -

DUNA COMENTARIO

Please enter your comment!
Please enter your name here