Home Parlamento Proceso pa entrega e ley di Identificacion obligatorio ta encamina

Proceso pa entrega e ley di Identificacion obligatorio ta encamina

52
0
SHARE
- Advertisement -

Lider di fraccion di MEP Rocco Tjon:

ORANJESTAD (AAN) – Den conferencia di prensa di fraccion di MEP, Diaranzon mainta, Parlamentario Rocco Tjon a trece dilanti cu e proceso pa entrega e ley di Identificatieplicht (Identificacion obligatorio) cu nan ta trahando riba dje, ta encamina y otro siman lo entrega esaki.

E parlamentario a menciona cu nan a sinta cu Orden di Abogado y nan a trece nan puntonan dilanti, y esakinan lo wordo incorpora den e Memorie van Toelichting.

Tambe a sinta cu Cuerpo Policial y nan “feed back” tambe lo wordo incorpora, ademas di a reuni cu otro stakeholders cu tin experiencia riba tereno di husticia.

Ademas a tuma den consideracion caba, tur aspecto cu a wordo treci padilanti ora di introduci e ley aki na Curacao y Hulanda, ya cu e ley aki ta data for di inicio di añanan 90. Kiermen, tur preocupacion pa loke ta trata privacidad a wordo incorpora den e ley aki, Parlamentario Rocco Tjon a subraya.

Tur esaki, e parlamentario a subraya, ta eleva e seguridad na Aruba y ta duna husticia un instrument adicional pa por combati criminalidad na un manera eficiente y eficaz.

Otro punto cu e Parlamentario Rocco Tjon a referi na dje, ta cu segun’e tin un preocupacion cu a wordo mustra den pueblo, tocante un peticion pa investigacion di un caso di corupcion, cu e fraccion di MEP a entrega na Ministerio Publico y cu e instancia aki lo no a investiga e caso.

E parlamentario a señala cu incluso un parlamentario di oposicion a bisa esey, pero e no ta corecto.

Ministerio Publico a duna di conoce cu nan no por a inicia e investigacion aki ainda, pa motibo cu nan no tin e experticia y e capacidad.

Parlamentario Tjon a declara cu nan ta na spera di Minister di Husticia pa haya sa di con Hulanda no kier brinda e asistencia, cual por cierto ta algo usual cu a sosode den pasado den diferente caso grandi.

Tjon a agrega cu si Hulanda no ta brinda e asistencia aki, fraccion di MEP sa ki tipo di asistencia mester y nan lo percura, e ora ey, pa den presupuesto 2019 fondonan wordo ubica, pa OM haya e experticia y e capacidad cu e mester pa por atende cu e caso aki.

El a agrega cu pueblo por ta trankil, cu fraccion di MEP no a neglisha e caso en cuestion, y nan no a influencia ningun instancia pasobra nan mester traha imparcialmente, pero lo percura atravez di e instrumentonan cu nan tin na nan disposicion pa percura pa nan haya fondo, experticia y capacidad pa por atende, no solamente cu e caso aki, pero pa tur caso cu tin di haber cu corupcion y integridad.

 

 

 

- Advertisement -

DUNA COMENTARIO

Please enter your comment!
Please enter your name here