Home Social Proyectonan dirigi riba ‘nos grandinan’ tambe tin di haya prioridad riba e...

Proyectonan dirigi riba ‘nos grandinan’ tambe tin di haya prioridad riba e isla

20
0
SHARE
- Advertisement -

ORANJESTAD (AAN): Na Aruba awor den 2018, tur hende por ripara cu ultimamente tin hopi atencion pa hubentud. Esaki ta un bon desaroyo cu ta indispensabel pasobra  hobennan  ta forma un grupo den nos comunidad cu ta hopi vulnerabel y merece di hopi atencion.

Pero tog, un sociedad no mester pensa solamente riba futuro y lubida presente.  Pueblo ta hayando e impresion, cu na Aruba casi tur cos ta dirigi riba hubentud. Por ehempel programanan di television, pues tin masha poco programa na nos canalnan local cu ta dirigi riba nos grandinan. Programanan di radio ta mesun cos, mayoria ta dirigi riba hubentud.  Den weekend tin algun cu ta toca musica di decada di 1950, 1960, y 1970 cu ta trece hopi nostalgia.

Comercio ta hopi dirigi riba hubentud, actividadnan recreativo ta hopi dirigi riba hubentud.  Pero no tin mucho cos pa nos grandinan fuera di bingo na diferente Casino.

Mientras cu cifranan di Oficina Central di Estadistica ta confirma loke tur hende sa, esta cu e cantidad di persona cu ta enveheciendo ta mucho mas grandi cu e grupo di hobennan (e asina yama “vergrijzing”), toch ta manera  un cos cu e grupo aki ta worde lubida.

Aki no ta referi solamente na e grupo di nos grandinan cu ta interna den casnan di cuido, sino tambe esnan cu ya tin un edad halto (pensionado), pero ainda ta vital y activo, sea bibando riba nan mes of cerca famia. Nan ta esnan cu a pone e fundeshi di e pais riba cua nos ta bibando awe.

A bira tempo pa nos haci mas pa nos grandinan.  Tin di duna nos grandinan e balor, aprecio y atencion cu nan merece.  Tin di aplaudi Biblioteca cu tin biaha ta organiza curso pa nos grandinan, como tambe e.o. Organizacion OPPA.  Hasta Setar NV ta ofrece nos grandinan, prijs reduci pa nan tin Internet na cas.

Pero aparte di esey, kico Aruba por haci pa nos grandinan?  Sociedad tin di bin cu iniciativanan cu ta haci nan bida diario mas agradabel posible. Den e  casnan di cuido mester bin mas personal, no solamente pa cuido sino tambe pa haci actividadnan recreativo cu e grandinan pa asina evita cu nan ta pasa gran parti di nan dia sinta den un stoel ta wak pafo.

Mester ekipa e centronan aki mihor, pone mas fondo disponibel y tuma na serio loke nan ta duna como necesidad, pa asina nan por ehecuta e plannan cu nan tin na bienestar di nos grandinan.

Pa esnan cu no ta interna y cu ainda ta vital y activo,  mester introduci p.e. e tarheta di descuento, cu cual nan ta haya descuento na mas tanto negoshi posibel pero tambe descuento na p.e. Cinema, na Cas di Cultura pa por bay wak comedia y otro actividadnan cultural y recreativo.

Transporte publico mester ta gratis pa nos grandinan ya asina nan por keda mas largo activo y movibel, loke ta contribui na nan estado di salud, tanto mental como fysico.

Pueblo conoce na Aruba e servicio di “Telefon pa Hubentud”, un iniciativa hopi balioso y cu a demostra su derecho di existencia.   Kizas e momento a yega pa bin cu un “Telefon pa nos Grandinan” tambe, y  e lo ta sumamente necesario y ta yena un bashi den e servicio na nos grandinan.

Tanto gobierno como tambe  sector priva mester cuminsa  haci nan oficina y localidadnan mas asesibel pa esnan cu ta den rolstul y tambe bin cu iniciativanan pa elimina e hecho cu grandinan mester para wara ratonan largo den rij pa por haci nan diligencia.

Pues no ta tur ora mester di proyectonan miyonario pa por facilita e bida diario di nos grandinan. Hopi biaha ta hustamente e cosnan chikito y praktico den bida diario, ancra den un maneho structura, ta haci e diferencia grandi.

 

- Advertisement -

DUNA COMENTARIO

Please enter your comment!
Please enter your name here