Home Parlamento Rocco Tjon no por compronde pakico Hulanda no kier yuda investiga caso...

Rocco Tjon no por compronde pakico Hulanda no kier yuda investiga caso di corupcion

244
0
SHARE
- Advertisement -

ORANJESTAD (AAN): Durante conferencia di prensa di partido MEP, lider di fraccion a elabora riba entrega di un caso cu nan a entrega na Ministerio Publico na Februari di e aña aki, un caso na unda nan a señala tur sospecho cu nan tin contra actonan di mal gobernacion y actonan di corupcion cu a tuma lugar bao di gobierno anterior.

Tjon ta bisa cu despues cu nan a entrega a caso aki na Februari, dos siman despues manera nan a haci un peticion na Ministerio Publico (MP), nan a haya un follow up di MP, na unda nan a bisa cu nan ta comparti e sospecho cu nan a señala den onderzoeksrapport aki.

Siman pasa riba diahuebs, nan a entrega informacionnan nobo y adicional regarda na mesun topico aki. Tjon a bisa cu nan a haya un mal noticia di Ministerio Publico, pa motibo cu den su concepto pa motibo cu esaki ta bay hasta mas leu cu por papia cu nos autonomia hudicial ta wordo mina.

E parlamentario a splica cu e informacion cu nan a entrega tabata un ‘zaaksdossier’ adicional riba e caso cu ya caba nan a entrega. E noticia cu nan a haya di MP ta cu e caso ainda no a wordo atendi cune. Y e motibo ta door cu nan ta wardando di asistencia pa loke ta personal y experticio.

E kier splica e proceso con e tipo di casonan aki ta cana den husticia, pa asina pueblo por sa tambe con serio e acusacionnan ta y e onderzoeksrapport ta cu nan a entrega. For di momento cu MP bisa nan cu e unico cos cu nan falta ta asistencia di personal y di experticio, esey ta nifica cu propuesta pa e proyecto y un plan con pa atende cu esaki den e proceso hudicial.

Den husticia, ora tin informacion, e departamento di informacion di husticia ta traha un documento, y e documento aki ta yama un “pre-weeg”. Cu esaki nan ta valida e informacion cu nan a ricibi. Den e caso aki, e onderzoeksrapport cu nan a entrega a wordo valida. Departamento di informacion ta presenta e documento aki na un comision cu mester dicidi si ta sigui cu e caso of no. Si e grupo aki, cu ta consisti di personal di MP, Cuerpo Policial y di RST, ta dicidi cu ta sigui cune, nan ta traha un “projectvoorstel”.

Den un “projectvoorstel” ta enfoca riba aspecto con real ta pa prueba e sospechonan aki, cuanto gasto ta envolvi den e investigacion, con largo e investigacion ta bay dura. Hopi importante ta con grandi e chens ta cu por prueba tambe e acusacionnan cu tin riba mesa. Asina cu e comision dicidi cu ta sigui cu e caso, ta traha un ‘plan van aanpak’. Den e plan aki, mester señala y describi detayadamente ki tipo di personal mester, cuanto e gastonan ta bay ta, y ki ta e experticio necesario pa atende cu e caso. Kiermen cu si MP a bisa nos, y nan a bisa nos esaki siman pasa, cu unico cos cu nan ta wardando ta asistencia di Hulanda pa loke ta trata experticio y capacidad, ta pasobra nan a cana tur e fase aki, e onderzoeksrapport a wordo confirma door di MP, y unico cos cu falta ta pa cuminsa cu e investigacion.

Tjon a indica cu MP a bisa cu na momento cu asistencia yega, nan por cuminsa e investigacion di biaha. E parlamentario ta hopi preocupa riba e desaroyo aki, pa motibo cu nan sa cu ya caba, for di hopi luna caba, Minister di Husticia a haci un peticion na Hulanda pa haya asistencia pa loke ta mas capacidad y mas experticio, pa entre otro, atende e tipo di casonan aki.

Tjon a enfatiza cu e ta haya hopi preocupante, hasta straño, cu Hulanda no ta dunando e asistencia aki, mirando e onderzoeksrapport presenta. Si sigui e desaroyonan cu Hulanda tabata bisa nan, entre otro, su mesun persona a wordo bisa esaki door di Hulanda, na momento cu el a acusa CAft di ta complice di e situacion financiero desastroso. Hulanda a bisa bon cla cu si, pero na Aruba tampoco no tin un politica di ‘bon gobernacion’. E no por compronde si esaki ta nan exigencia, con por ta posible e ora, cu si tin un onderzoeksrapport extenso entrega na e instancia cu mester investiga relaciona cu practica di mal gobernacion y corupcion, pa lunanan largo nan ta nenga di duna personal necesario pa investiga esaki.

Kico ta haci e hecho aki mas condenable ta cu peticion cu a wordo haci door di Minister di Husticia di Aruba a wordo aproba door di Hulanda! E ora ey ta hopi straño cu e aprobacion aki no ta wordo ehecuta.

E lider di fraccion di MEP a indica cu nan a haci preguntanan na Minister di Husticia, na unda nan kier sa for di Minister mes, di con e aprobacion no ta wordo ehecuta door di Hulanda. Esaki ta algo hopi straño, serio y condenable si ta trata di un caso di chantahe cu ta wordo hunga contra pais Aruba. E no kier ni pensa cu esaki ta e caso! Pero e ta indica cu tin hopi cos cu ta punta riba esaki. E otro pregunta cu nan a haci na Minister ta ki tempo e asistencia aki lo wordo brinda, pa asina por cuminsa ehecuta e investigacion cu ta pendiente na MP.

Fraccion di MEP no lo permiti ningun tipo di chantahe contra pais Aruba y nan lo sigui e desaroyo aki hopi cerca, y nan lo sigui haci nan mesun investigacionnan pa haya sa kico e motibo ta pakico Hulanda no kier ehecuta e aprobacion cu ya caba duna pa Minister di Husticia di Hulanda anterior. Nan lo warda contestanan di Minister di Husticia di Aruba, kende por cierto cu dia 22, e Minister lo ta presente den comision di asuntonan hudicial, caminda nan lo elabora riba tur desaroyo riba husticia. Dependiendo di contestanan, y si nan ta confirma nan preocupacionnan, no lo resta nan nada mas cu acudi na nan coleganan na Hulanda, di comision di IPKO, cu tin un comision di integridad, un aspecto cu Hulanda ta enfoca hopi riba dje y pa nan tambe ta di suma importancia. Nan lo comparti onderzoeksrapport na nan coleganan di parlamento Hulandes, pa asina nan mes cuestiona nan mandatarionan, y haya sa kico ta e motibo a pone obstaculonan contra un investigacion cu a tuma lugar na Aruba.

- Advertisement -

DUNA COMENTARIO

Please enter your comment!
Please enter your name here