Home Social Segun sra. Audrey Croes-Lacle di Fundacion Adopt-an-Addict “crisis social ta escalando”

Segun sra. Audrey Croes-Lacle di Fundacion Adopt-an-Addict “crisis social ta escalando”

267
0
SHARE
- Advertisement -

ORANJESTAD (AAN): Sra. Audrey Croes-Lacle di Fundacion Adopt-an-Addict tambe ta apoya recaudacion di fondo pa entiero di Ski, y el a indica cu nan ta hopi tristo riba e manera cu Ski a fayece.

Ski no tabata un persona violento, Adopt-an-Addict a yega di acerca Ski tempo cu nan tabata bezig cu Nathaly, Nathaly mes a pidi pa nan purba di convence Ski, pero e no tabata kier yudanza, e tabata den su ‘comfort zone’. Varios biaha el a papia cu Ski, ora e tabata cana rond cu su lamunchi, mango y coco, pero e tabata den su ‘comfort zone’.

Sra. Audrey Croes-Lacle a bisa cu e aña aki e fundacion ta bay cumpli cu su di 10 aña y nan ta kere cu ta tempo pa cosnan bay manera debe ser. Problema di adictonan a pasa over y aunke gobierno a implementa un plan riba crisis social, nan mester wordo scucha! Na 2012, el a presenta proyecto ‘The Blessed Village’, pero esaki no a haya atencion di ningun gobierno, y cu e crisis plan di gobierno actual, a bira tempo pa e hendenan aki cuminsa biba dignamente y den paz.

Kico ta e definicion di un asina conoci ‘choller’, e ta un persona cu ta biba riba caya, slodig y semper asocia cu criminalidad y droga. Pero tin di nan, y mayoria di nan, cu e trauma ta cuminsa di chikito, di casnan disfuncional, di   mayornan cu no ta wak pa nan yiunan, mama y tata cu ta traha y despues pa nan placer ta bay bebe y laga nan yiunan nan so. E situacion ta escalando, segun Sra. Croes-Lacle, pasobra hasta welanan ta laga e muchanan den auto cera pa bay den bar. Eseynan ta tipo di trauma cu ta causa cu un persona ta cuminsa bay den caminda robez.   Mayornan ta conciente di loke ta pasando na Aruba!

El a splica cu nan fundacion a realiza un terapia di maneho di rabia (anger management) y el a sinta den seccionnan aki, y el a indica cu su wowonan a habri y su mente y curazon tabata haci dolor, ora el a wak kico e personanan aki a pasa aden como mucha y for di unda nan adiccion a cuminsa.

Un choller hopi biaha ta fisicamente y mentalmente afecta, pero nan ta un pashent cu tin derecho riba ayudo. A bira tempo pa Aruba tin un shelter pa nan, na unda por duna nan terapia y tin un urgencia grandi riba psicologonan pa trata e adictonan. Na Aruba e adictonan ta wordo manda di biaha na psikiatra, pero nan mester di psicologo pa asina papia cu e hendenan aki, pa asina nan saca nan dolor, maneho di rabia tambe ta hopi importante y hasta terapia di hipnotiza por yuda den cierto casonan, despues di esey, por yuda nan cambia nan bida.

Na aña 2010, Adopt-an-Addict tabatin 97 hende na Santo Domingo, den momentonan aki nan tin 16 cu 20 hende constantemente na Santo Domingo y na nan hogar na Moko 28, nan tin cupo pa 16 cu cantidad ta varia. Nan por yuda mas hende, y ultimamente nan a haya hopi peticion di hende muher, pero si nan no tin un lugar adecuado pa detox nan, nan no por traha cu nan pasobra nan mester prepara nan pa viaha.

Sra. Audrey Croes-Lacle a enfatiza cu a yega ora pa comunidad uni y enfrenta e problemanan aki, laga ego un banda, y ban traha pa bienestar di e ciudadanonan aki.

 

- Advertisement -

DUNA COMENTARIO

Please enter your comment!
Please enter your name here