Home General Serlimar ta hopi satisfecho di con e acuerdo cu Ecogas ta funcionando

Serlimar ta hopi satisfecho di con e acuerdo cu Ecogas ta funcionando

23
0
SHARE
- Advertisement -

ORANJESTAD  (AAN): Diabierna mainta Twayma van der Biezen, Marketing & Sales Manager di Serlimar a duna un splicacion riba e proceso y e acuerdo cu a wordo firma recientemente entre Ecogas y Serlimar.

Durante un conferencia di prensa na Ecogas, van der Biezen a splica cu e acuerdo ta encera cu Ecogas lo procesa e desperdicio solido municipal, residencial y comercial.

Desde comienzo di Juli Serlimar a cuminza deposita desperdicio residencial y comercial na Ecogas.

Ta trata di un total di alrededor di 2456 tonelada, cu Serlimar ta deposita na Ecogas tur luna.

Despues cu e sushi wordo procesa, ta forma bultonan cu ta wordo dera na Seroe Teishi.

“Aworaki nos ta calcula cu nos a casi yena 6.900 meter cuadra cu bultonan”.

“Esaki ta necesario pa nos continua cu e proceso di pone e liners y e pipanan di gas, pa saca e gas”.

Esaki segun e representante di Serlimar, kende a sigui bisa cu e otro tipo di desperdicio manera cadaver, desperdicio industrial, di construccion of likido, ainda ta wordo deposita na Parkietenbos.

“Desde cu Serlimar y Ecogas a cuminza traha hunto, nos ta bayendo den direccion di un mihor maneho di desperdicio”.

“Esaki tin un impacto positivo riba nos medio ambiente y riba Parkietenbos, unda cu e situacion ta wordo alivia”, segun van der Biezen.

Asina por continua cu e proceso di remediacion di Parkietenbos, cu e meta principal pa cera esaki den futuro.

Aruba den su totalidad tur aña ta produci alrededor di 150 miyon kilo di sushi y esaki tin un impacto basta grandi riba Parkietenbos, unda cu mester realiza cu no por sigui deposita tur tipo di desperdicio eynan mas.

“Aworaki Serlimar y Ecogas tin un acuerdo minimo di 6 luna y un maximo di 2 aña y den e periodo aki mester bin cu un solucion permanente pa loke ta maneho di desperdicio”.

“Serlimar pa logra esaki ta trahando hunto cu otro departamentonan di Gobierno y otro instancianan, pa bin cu solucionnan pa un maneho permanente di desperdicio”, segun van der Biezen.

“Di nos banda nos tin departamentonan cu ta investigando e composicion di desperdicio residencial y dentro di poco un compania di Inglatera  ta bay analisa nos desperdicio, via testnan den laboratorio”.

“Tur esakinan ta necesario, pa asina continua y yega cu un otro maneho di desperdicio den futuro”.

Esaki segun e Marketing & Sales Manager di Serlimar, kende a indica cu mester analisa nos desperdicio bon, prome cu un dia por yega na un maneho di ‘Waste to Energy’, manera cu Minister Otmar Oduber a menciona.

Van der Biezen a splica tambe cu Serlimar ta bezig ta uza santo di calichi pa tapa areanan cu sa pegan candela na un manera espontaneo.

 

- Advertisement -

DUNA COMENTARIO

Please enter your comment!
Please enter your name here