Sindicato di Elmar a divulga monton di conflicto di interes den e compania

    1120
    0
    SHARE
    - Advertisement -

    ORANJESTAD (AAN): Segun Raymond Maduro, kende ta presidente di Sindicato Alvast cu ta representa trahadornan di NV Elmar, recientemente a tuma lugar un reunion, cu e board di Hunta di Comisario di NV Elmar, unda a trata e tantisimo kehonan contra e director di e compania, esta Robert Henriquez.

    Segun e Sindicato, e reunion tabata necesario un investigacion rigoroso di e maneho cu e director y su team rond di dje a hiba den e ultimo 8 aña.

    E ocho añanan aki a produci masha hopi keho y señalnan riba e maneho aki.  E kehonan a bin no djis di e trahadornan, pero tambe di cliente, y proveedor di servicio.

    Sindicato no por cualifica e maneho aki como nada otro cu un maneho desastroso, unda a malusa posicion y fondonan di e compania  pa beneficia interesnan personal di “cierto persona- y brothernan”.

    Aki Maduro di Sindicato Alvast a duna algun ehempel, esta cu e director Henriquez a rondona su mes cu algun colega/brother, di cual algun di nan a hasta lanta negoshi priva den ramo di auto electrico, mercadeo, consulting y uitzendburo.  Y sorprendentemente Director Henriquez a duna e coleganan/brothernan aki tur espacio pa por haci negoshi  casi exclusivo cu e compania NV Elmar.  Nan a haci esey, poniendo un banda tur otro procedimentonan cu ta conta pa otro companianan cu kier haci negoshi cu e compania di electricidad.

    Sindicato a revela cu ta trata di entre otro Activated Power, y Ace Engineering cu ta worde maneha pa casa di e coleganan/brothernan aki.

    E mesun grupito aki ta core rond den auto di coriente  di compania NV Elmar, cu por cierto a worde cumpra na Activated Power y cu tin charger instala na nan cas, unda cu nan por charge e auto aki  bay goal riba cuenta di NV Elmar.

    Segun e Sindicato, recientemente un di e brothernan aki a pidi su retiro inespera, y esaki a sorprende tur hende na e compania.

    E motibonan pa e retiro?  Segun Sindicato Alvast, esey awor lo ta bon pa averigua si e Charger instala na su cas tey ainda , pasobra e no ta trahando mas na e compania Elmar.

    Otro ehempelnan ta cu Elmar ta huur varios empleado for di ACE Uitzendburo, unda  cu e negoshi aki ta gana mas cu 10.000 pa 15.000 Florin pa luna riba cabes di e empleado, di cual cu e brothernan aki ta saca beneficio  pa nan compania  ariba custia di e trahadornan.

    Esakinan ta djis algun ehempel di e conflicto di interes y fechorianan cu segun e Sindicato ta tumando lugar den e ultimo 8 aña  den compania, cu e bendicion  di esnan  cu ta encarga  cu e compania.

    E ehempelnan aki no ta caso riba nan mes, ta hopi mas caso tin unda cu ta viola tur tipo di etica y moral,  y cu hamas algo  bisto  asina den compania  manera Elmar

    Sindicato Alvast ta condena e typo di practicanan aki categoricamente , y a pidi e hunta di comisario nobo di NV Elmar , pa investiga tur e acusacionnan y tambe pa ruim op de boel na compania Elmar.

    Trahadornan y sindicatonan ta pendiente riba e investigacion cu tin riba Robert Henriquez di cual cu nan a compronde, cu e cooling-off period lo termina e siman aki, y ta spera cu e board nobo di Hunta di Directiva lo sa di  tuma un decision riba e rumbo y e futuro maneho pa cu NV Elmar, pa asina e paz laboral reina back na compania.

    - Advertisement -

    DUNA COMENTARIO

    Please enter your comment!
    Please enter your name here