Home Labor Sindicato TOPA ta puntra su mes si DRH ta para riba ley

Sindicato TOPA ta puntra su mes si DRH ta para riba ley

30
0
SHARE
- Advertisement -

*DRH no ta respeta decision di huez, den casonan di ambtenaar

ORANJESTAD  (AAN): Diahuebs Sindicato TOPA a tene un conferencia di prensa, pa reacciona riba un entrevista cu Departamento di Recursonan Humano (DRH) tabata tin cu un medio di comunicacion, unda cu cierto informacion a wordo duna.

“Pa nos como sindicato TOPA, nos no a haya e informacion cu a wordo duna den su forma corecto”, segun presidente di TOPA Rene Bernabela.

El a splica cu riba 26 di Juli sindicatoTOPA a tene un reunion cu Prome Minister, pa papia riba algun tema.

Un di e temanan ta e asunto di ‘Gelijk Bedrag’ y Bashi Premie, mientras cu a papia tambe riba e comunicacion entre DRH y TOPA, relaciona cu dunamento di informacion riba e miembronan di e sindicato.

Segun Bernabela, el a duna di conoce na Prome Minister, cu tin un situacion penoso tumando lugar na DRH for di aña pasa y na comienzo di e aña aki.

“Durante gobierno anterior tabata asina cu TOPA tabata manda carta pa pidi cooperacion for di DRH, pa nos por haya informacion cu ta toca nos miembronan, esta riba nan posicion huridico”.

“Esaki door cu hopi biaha den casonan di corte den cual e miembronan di TOPA tabata envolvi, unda cu e caso a yega su final y e resultado a keda cla, esaki no a wordo procesa na DRH”.

Esaki segun e presidente di TOPA, kende a sigui bisa cu hunto cu e oficina di Prome Minister, a dicidi di forma un comision pa sinta cu DRH, pa mehora e cooperacion  entre DRH y TOPA, pa loke ta e dunamento di informacion riba e miembronan di TOPA.

Despues di tur esaki DRH a reacciona den prensa, bisando cu TOPA a bay keha cerca Prome Minister riba casonan pa cual nan no ta haya atencion.

Esaki segun Bernabela kende a sigui bisa cu esey ta corecto.

“Nos como parti di TOPA ta bisa cu ta increibel pa wak cu riba di 14 di Maart y 29 di Maart nos a manda carta pa DRH pa pidi pa un reunion cu e departamento, pa haya informacion riba e posicion huridico di e miembronan y te cu awe ainda nos no a haya un reaccion”.

Esaki segun Bernabela, kende ta puntra su mes kico e directora di DRH kier pa TOPA hasi.

El a mustra prensa un lista di tur e hendenan cu ta pega pa loke ta nan posicion huridico.

Bernabela a bisa tambe cu ta logico cu e mester a bay cerca Prome Minister, pasobra ta Prome Minister ta responsabel pa e departamento aki.

Diferente hende a wordo priminti cierto schaal relaciona cu nan promocion y na momento cu nan a bay cu pensioen ainda esey no a wordo ahusta.

Mirando cu nunca e salario a wordo ahusta, esey tin cu sosode ainda, segun Bernabela, kende a indica cu den algun caso di corte huez a dicta na fabor di ambtenaarnan y asina mes DRH te ainda no a paga e ambtenaarnan cu tin derecho riba esaki.

Bernabela a puntra su mes di DRH ta para riba Corte.

 

- Advertisement -

DUNA COMENTARIO

Please enter your comment!
Please enter your name here