Home General “Ski” tabata e persona semper cu caracter trankilo y Aruba lo bay...

“Ski” tabata e persona semper cu caracter trankilo y Aruba lo bay haya su falta

2383
0
SHARE
— Potret cortesia Michael-Anthony Fowler.
- Advertisement -

ORANJESTAD (AAN): Un cantidad di reaccion negativo por a wordo sinti Dialuna atardi den pueblo, despues cu nan a mira con un Website local a transmiti en vivo con e conocido “Ski” a hala su ultimo roseanan.  Pueblo stima Ski, y no a gusta e forma con el a bandona e mundo aki.

E nomber completo di “Ski” ta Hubert Arrindell, naci na Aruba riba 6 di Mei 1968. Kiermen, el a caba di haci su 50.  Un ciudadano cu caracter trankilo, hopi lief, atletico, creativo, y nunca bo ta mire cu actitud agresivo.

BIKE CROSS:

Ya pa mas di 15 aña e ta cana rond den varios area di Playa, pero mayoria vez bo ta haye riba bicicleta.  Su creatividad pa drecha bicicleta, y ‘decora’ nan ta admirable.  Pueblo no tabata gusta pa bo a yama Ski como ‘choller’.  Pasobra nan no ta considere como choller.  E tabata move hopi riba caya, y tabata yuda hendenan cu ta haya flat-tire cu auto, of hasta yuda drecha bicicleta.

E tabata usa semper un molina bieu di Circulating Fan, pa pone dilanti na e cacho di su bicicleta completamente “customized”, y esaki ta draai door di biento, y e ta imita asina un propeller.

Hubert alavez tabata un coredor di Bicicleta BMX, cu a competi na diferente ocasion den decada di 1980.  E ta conoci pa un ciclista cu ta ‘trapa’ na un forma hamas bisto, pa asina e yega na final.  E por bin for di patras, pasa tur hende y drenta na e finish line como e prome.  Pesey mes, el a yega di saca cara di Aruba durante competencianan di Bike Cross.

Un fuente a revela tambe, cu e tin keto bay e record di bula over di mas hopi bari, cu su bicicleta.

E tabata haya hopi cariño di pueblo, y regularmente ta haya yudanza di ciudadanonan cu ta cumpra cuminda pe, cu ta duna un contribucion pa asina e por keda cu un sonrisa riba su caranan.  Fuentenan den Polis a bisa tambe, cu e no ta conoci como un persona cu ta molestia turistanan.  Pesey hendenan local tabata mire como un persona trankil.

E speranza tey cu Recherche lo por investiga pa asina haya sa kende den fin di siman a tira riba dje durante un tipo di drive-by shooting, y cu posiblemente a causa cu el a perde su bida Dialuna merdia un tiki pabao di Eet Cafe The Paddock.

Na famia y amigonan di Hubert Arrindell, DIARIO ta desea nan e mas sincero palabra di condolencia.

- Advertisement -

DUNA COMENTARIO

Please enter your comment!
Please enter your name here