Home Hudicial Sospechoso complice di varios hortamento di turista laga liber pendiente su caso...

Sospechoso complice di varios hortamento di turista laga liber pendiente su caso penal

131
0
SHARE
- Advertisement -

Ariba peticion di Fiscal

ORANJESTAD (AAN)  – E homber P.V. y muher M.I. a presenta dilanti Hues pa e casonan penal cu Ministerio Publico a cuminsa contra nan. Fiscal a pidi pa laga M.I. liber pendiente su caso penal y Hues a bay di acuerdo. Door cu P.V. tin un carchi di castigo, e si ta keda encarcela.

VARIOS BIAHA A HORTA TURISTA

E 3 acusacionnan cu Fiscal a presenta contra P.V. ta cu riba 24, 27 Januari 2018 y 4 Februari 2018 hunto cu otro a horta tasnan di turistanan. Fiscal a bisa cu e muher M.I. ta complice.

CASO POSPONI

Fiscal a bisa cu e caso ta pro forma. E motibo cu e caso ta pro forma ta pasobra cu ta den e temporada di vacacion (receso). Segun ley, dentro di un periodo di mas o menos 3 luna, un sospechoso mester presenta dilanti Hues den Corte di Husticia. Si esaki no sosode, e chens ta grandi cu abogado di e sospechoso lo exigi pa su cliente wordo laga liber pasobra a viola e ley.

Pesey Fiscal ta laga e caso bin dilanti pero pro forma y ta pidi pa pospone e caso.

SOSPECHOSO COMPLICE LAGA LIBER

Fiscal a pidi Hues pa pospone e caso y pa laga M.I. liber pendiente e caso. Fiscal a bisa cu e motibo cu e ta pidi pa M.I. bay liber ta pasobra ta promer biaha cu e ta cay sera, mientras cu P.V. tin carchi di castigo caba.

Hues a bay di acuerdo pa laga M.I. liber y a bisa cu ta pospone e caso pa Diahuebs 27 September 2018 pa 10’or di mainta.

A SUBI CASTIGO PA HORTA TURISTA

Ta asina cu den Codigo Penal a aumenta e castigo pa esnan cu ta horta turista. Esaki pasobra ta haya cu e hortamento di turista ta perhudica nos pilar di economia cu ta turismo. Aruba ta haciendo hopi promocion “One Happy Island”. Turistanan ta bin nos isla cu e confianza cu e isla ta sigur di criminalidad.

Ta di condena e hecho cu mientras cu e turista ta drumi riba nos beachnan pa disfruta di nos beachnan y e solo, cierto personanan ta dedica nan mes na horta e turistanan nan pertenencianan. Tambe sa sosode cu turista ta wordo atraca of ta wordo horta for di camber di e hotel.

No por permiti cu cierto personanan ta bay perhudica henter e economia di nos pais y pesey a subi e castigo caminda ta considera e hortamento di turista un delito hopi serio.

Dia di tratamento di e caso lo bay haya sa kico Fiscal su punto di bista ta y ki ta e castigo cu e ta exigi pa e homber P.V. y e muher M.I.

Hopi biaha ta asina cu ora cu Fiscal pidi pa laga un sospechoso liber, ta pasobra cu Fiscal lo tin pensa un castigo combina. Sinembargo no tur ora ta asina.

A yega di sosode cu despues di tratamento di e caso ora cu sentencia cay, Fiscal ta ordena pa detene e persona atrobe pa e caba di sinta e castigo cu el a haya cu ta mas cu loke el a sinta caba.

 

- Advertisement -

DUNA COMENTARIO

Please enter your comment!
Please enter your name here