Den Centro di Bari Tanki Lender:
ORANJESTAD (AAN)—Den entrevista cu nos redaccion, sr. Ricardie Yrausquin, presidente di Stichting Maneho Social Aruba, a anuncia tambe cu dialuna 20, den Centro di Bario Tanki Lender mes na Tanki Leendert, ta bay cuminza un traimerdia cu yama Social Care Aruba, y e ta un proyecto piloto.
El a splica cu ta trata aki di un concepto diferente, Yrausquin a comenta, y a tuma e ocasion aki pa gradici tur e leidsternan cu ta bay take care di e muchanan.
Lo traha cu maestra y maestronan pensiona cu ta bay mantene e gastonan hopi abao. E prijs ta hopi social y ta bay inclui cuminda cayente.
E traimerdia ta bay consisti di ayudo pa traha les, pero ademas lo hinca cultura y arte combina cu deporte.
Inscripcion a cuminza diaranzon, pero ya caba sin anuncia esaki den prensa tabata tin 30 mucha caba cu a registra, ora mayornan a tende di e proyecto.
Cupo ta limita pero awe, diasabra e oficina lo ta habri pa por haci inscripcion entre 9’or di mainta te 8’or di anochi.
Mayornan ta wordo pidi pa presenta cu un copia di e zorgpas di AZV di e yiu, y photo tamaño passport. El a remarca cu nan ta trahando cu standardnan di Fundacion pa Nos Muchanan. Cu cooperacion di comercio a logra lanza e proyecto piloto aki.
Esaki ta pasobra e Stichting tin e intencion di bay den tur e centronan di bario y e ta den comunicacion cu nan, pero ta bay habri poco, poco.
Ricardie a haci un yamada na comunidad, pa laga esaki pa muchanan di mayornan cu no por paga un opvang cu prijs normal y cu ta pasa den hopi duro financieramente, pa nan inscribi prome y si tin mas cupo nan por sigui ora nan bay den otro barionan. Ta bay cuminza cu 75 mucha y aworaki tin 30 inscribi caba. E intencion ta pa traha cu cada grupo di 20 mucha, segun edad y klas cu nan ta bayendo.
E CENTRO DI BARIO:
Tocante e infrastructura mes di Centro di Bario Tanki Lender tin cambionan ta tumando lugar.
Yrausquin a duna di conoce cu despues di a organiza y radio-telethon na Mei ultimo, pa recauda fondo pa e renovacion completo di e centro di bario. A haya aprobacion pa den e fin di siman aki, incluyendo Diadomingo, verf e edificio completo. Esaki ta e prome cambio danki na un empresa comercial bon conoci. Den e transcurso di siman lo tuma lugar cambionan structura di bentana y porta. Otro compania a haci donacion di dos airco pa e local di les, locual Ricardie ta gradici inmensamente.
Miembro di e Directiva di Centro di Bario, Ray Ann-Hernandez, tambe a elabora al respecto, y a mustra su satisfaccion, ya cu e trabaonan aki ta tumando lugar hunto cu e directiva mes. E tambe a gradici e companianan cu ta kere den e proyecto aki y ta duna su support. El a menciona cu e cancha deportivo tambe lo haya renovacion y nan ta trahando un dossier pa wak di unda nan ta haya fondo pa keda cla cu esaki. Asina no solamente Tanki Leendert y vecindario sino tur amante di e deporte di futbol di sala, por bolbe disfruta di un joya di cancha y por organiza campeonatonan atrobe.
E hoben a gradici Ricardie y Stichting Maneho Social Aruba, cu ta haciendo un tremendo trabao pa yuda e Centro di Bario cambia nan metanan fuera di nan propio metanan, y pesey CBTL a habri porta pa e Stichting tambe.
Ray Ann a subraya cu awendia na Aruba mester pensa mas y mas den traha hunto y cera cabes, ya cu un man ta laba otro, pa asina logra cosnan grandi.
