Parlamentario Marisol Lopez-Tromp:
ORANJESTAD (AAN) – Parlamentario drs. Marisol Lopez-Tromp, lider di fraccion di partido POR, durante e reunion publico den Parlamento unda tur minister ta presente pa raporta na miembronan di Staten, loke a wordo haci durante e prome mitad di aña basa riba presupuesto, tabatin pregunta riba e miembronan di e huntanan di supervision di e diferente NVnan di gobierno, fundacionnan y otro organizacionnan den cual Gobierno ta conta cu miembronan.
E parlamentario di POR a puntra cual ta e proceso di screening ora ta nombra dicho miembronan, con ta elegi nan y cual ta e tareanan cu nan mester ehecuta. E pregunta aki a bin specialmente debi na e maneho di gobierno anterior, unda algun ex minister a pusha cierto di e cosnan cu ta nan responsabilidad pa haci y cu lo mester ta den begroting, pa cierto di e companianan aki carga financieramente pa nan, unda ta papia tin biaha hasta di miyonnan.
E ta considera cu ora e personanan cu tabata forma parti di e huntanan di supervision ta wak cu algo no ta corecto, nan lo mester a bisa no. No por ta asina cu awe ta wak den prensa documentonan cu por ta no ta ni completo cu ta mustra cu miyonnan a bay pa cosnan cu ta laga hende boca habri.
Teniendo na cuenta esaki y cu tur respet pa esnan cu a cubri of ta cubriendo e funcionnan aki cabalmente, a concientiza y, cu tur profesionalismo, e ta considera cu pa evita e casonan cu a bay robes, ta importante pa tin un perfil determina pa e funcionarionan aki y pa por tin control cu e personanan cu ta wordo nomina ta cumpli cune.
Finalizando e tema aki Parlamentario Lopez-Tromp, a pidi cada minister pa duna un splicacion di e huntanan cu ta cay bou di nan, con pa percura pa forma y maneranan pa evita pa e cosnan robes cu a pasa den añanan anterior no ripiti.
