Ta purbando di haya e fondonan necesario pa cubri entiero y duna honor na “Ski”

    429
    0
    SHARE
    - Advertisement -

    ORANJESTAD  (AAN):  Fundacion Rancho un biaha mas a yama un conferencia di prensa pa asina elabora tocante di e fayecimento di “Ski”. Clifford Rosa a duna di conoce cu danki na e famia y e yiu homber cu nan ta den contacto cune, y otro instancianan cu hunto ta trahando pa duna e ciudadano “Ski” honor  durante su entiero.

    Un entiero no ta algo cu ta bay facil pero den e caso aki como Fundacion nan a tuma e encargo pa zorg pa tin un sistema pa por recauda fondo pa di e manera ey e yiu homber, ni e famia no core cu ningun gasto pa cu e entiero.

    Comunidad a reacciona pero te ainda no a yega te na un suma pa ta satisfecho cune. Fundacion Rancho a haya sa cu Sociale Zaken ta utilizando e suma cu semper tabata tin cu ta e suma di 2 mil florin, pa yuda un famia den necesidad ora di entiero, Rosa a indica.

    Hopi hende ta yama pa puntra cuanto ta e placa cu tin mester pa cubri e gastonan di entiero. Lo mester e placa basico pa e gastonan di entiero como tambe pa duna honor na “Ski”.

    Tin personanan cu no por ofrece placa pero ta pone nan mes disponible como boluntario locual tambe ta hopi di aprecia.

    Pa e motibo aki a institui un comision pa por bay traha riba e draaiboek con e cosnan lo bay ta. Rosa a gradici Pierre Croes di AruTram, cual sigur nan aporte lo bira hopi grandi mirando cu desde diaranzon AruTram ta dispuesto pa tin un “donation box” riba e Tram. “E trahadornan ta asina motiva ya cu “Ski” tabata un bon amigo di nan y nan lo haci tur nan posible entre awe y mayan y diasabra y si no ta suficiente, nos lo sigui den siman recaudando fondonan pa asina por cubri tur e gastonan”, Clifford Rosa a expresa.

    El a agrega cu hunto cu Maria Silva a cuminza traha riba un plan pa asina comunidad completo por tuma despedida di “Ski”.

    Riba na manera of otro ta hincando un plan den otro. Via social media y otro medionan hende ta puntra pa wak si ki manera por yuda, Rosa a duna di conoce.

    Ta desea pa esnan cu tin experiencia of anecdota pa conta relaciona cu “Ski” pa esakinan no bay perdi. Lo cuminza archiva esakinan pa medio di email of otro maneranan cu e meta di mantene bibo e recuerdo di “Ski”.

    Fundacion Rancho ta esun prome responsable pa locual a wordo inicia y ta esun cu lo canaliza tur locual tin di haber cu e entiero. Banda di Fundacion Rancho, a bisa, tin un otro organizacion activo. Un biaha pa luna nan ta bay den e bario pa duna e ambulantenan cuminda y tambe ta un fundacion cu sigur mester sosten di comercio y di comunidad pa asina tambe por sigui draai, Clifford Rosa a enfatiza.

    E fondo di e benta di BBQ ta un fondo pa e organizacion aki (no Fundacion Rancho) y na e mesun momento nan tin un “donation box” caminda hende por haci donacion pa e asunto di “Ski” of su yiu, e representante di Fundacion Rancho a splica.

    Di nan banda, a bisa, nan Banco cu ta CMB ta sostene nan cu e intension aki. Stichting Rancho su cuenta di banco na CMB ta conoci y simplemente esnan interesa mester informa di e proposito di e donacion.

    - Advertisement -

    DUNA COMENTARIO

    Please enter your comment!
    Please enter your name here