Home Parlamento Ta urgi minister pa e fondonan TPEF wordo uza na un manera...

Ta urgi minister pa e fondonan TPEF wordo uza na un manera eficiente y eficaz

27
0
SHARE
- Advertisement -

Parlamentario Setty Christiaans di MEP:

ORANJESTAD (AAN) – Den conferencia di prensa semanal di fraccion di MEP, diaranzon mainta, Parlamentario Setty Christiaans-Yarzagaray, a referi como prome tema na e “Tourism Product Enhancement Fund” (TPEF), cu ta e fondonan pa mehora Aruba su producto turistico.

Esaki ta un proyecto di ley cu entre diahuebs cu diabierna ultimo, a pasa den Parlamento hunto cu e presupuesto di DOW. Esaki tabata riba agenda y naturalmente, parlamentarionan a trece diferente punto dilanti, segun e dama parlamentario.

El a splica cu e motibo pa cual e TPEF a wordo institui ocho aña pasa, ta mirando cu hopi biaha DOW mester concentra den Aruba henter, mientras cu nos industria turistico ta rekeri di mas atencion inmediato, hopi biaha den e aparato gubernamental no ta bay haya mesora pa cubri un necesidad.

E fondo aki a wordo lanta cu e meta di embeyece y mantencion di cierto productonan turistico rond di Aruba.

Parlamentario Christiaans-Yarzagaray a menciona cu el a bisa e minister cu e producto turistico ta un solo Aruba, pues riba su mes e ta un producto turistico, y e ta haya cu mester traha riba mayoria areanan di nos Isla y no riba un area specifico so.

Si mehora, por ehemplo, un area rond di sector hotelero pero e resto no, e turista ta nota e diferencia. Pero tin cu wak Aruba den su totalidad como un producto turistico.

Den e proyecto di ley aki tin varios plan, un di nan ta e boardwalk, cu ta similar na Linear Park, pero den area di Malmok.

El a haci enfasis cu berdad Linear Park ta haya mantencion pero no ta solamente e parti di embeyecimento ta importante, sino tambe di e aparatonan cu tin eynan pa hende haci ehercicio, cu ya varios di nan a cuminza daña.

Linear Park originalmente ta cay bao di TPEF, pero su mantencion e aparatonan ta cay bao di DOW.

Tambe tin diferente aspecto cu e fondo TPEF ta bay dedica na dje, parti di dje ta medio ambiente, pero tambe cultura y herencia.

Parlamentario Christiaans-Yarzagaray a tuma nota tambe cu parti di e fondo lo wordo uza pa un airco nobo na Museo Arkeologico.

E parlamentario a para keto un rato den e tema aki, pasobra Museo Arkeologico tin dos aña cera y e ta banda di  Oficina di Monumento.

E dama ta cuestiona e hecho cu hopi turista cu ta bishita nos Isla, entre nan turistanan crusero, ta puntra si e museo ta habri, y e no ta compronde di con un di e museonan di mas valioso di Aruba tin dos aña cera, pa motibo cu no por a pone e airco funciona bek.

Incluso Raad van Advise den su rapport ta indica cu e fondo no ta wordo uza suficiente y cu hasta tin placa cu ta pasa pa e aña siguiente. El a remarca cu di su banda el a urgi e minister pa haci uso eficiente y efectivo di TPEF mirando e hecho cu un producto turistico asina importante manera un museo, placa no a wordo dedica na dje.

Parlamentario Christiaans hunto cu su colega Treveden a pidi un relato financiero unda cu nan por wak cu dia 29 di augustus di aña pasa, den pleno campaña, un sistema di audio a wordo cumpra pa Caya Grandi. A wordo gasta den un software 105 mil euro, pero e airco di museo arkeologico no a haya atencion. El a agrega cu hasta tin un gasto di 300 mil dollar, cu ta mas cu mei miyon florin, cu no tin descripcion den kico a wordo gasta, pero tin un museo cu luna tras luna a pidi atencion pa e airco, pero esey no a sosode. E dama a expresa cu e ta contento di sa cu awor si e lo haya atencion y despues di dos aña e museo ta habri su porta bek.

 

 

- Advertisement -

DUNA COMENTARIO

Please enter your comment!
Please enter your name here