Home Gobierno Task Force lo inventariza tur actividad cu mester di un “hindervergunning”

Task Force lo inventariza tur actividad cu mester di un “hindervergunning”

14
0
SHARE
- Advertisement -

Minister Andin Bikker:

ORANJESTAD (AAN) – Minister di Husticia mr. Andin Bikker a reitera cu hopi ciudadano ta manda carta pa gobierno, pidiendo nan pa reforza e ley di “Hinderverordening”.

Den conferencia di prensa semanal di gobierno, dialuna, e mandatario a referi na e tema aki bek, indicando cu ora un ciudadano kier cuminza kibra piedra, coba tereno, etc., e mester pidi un vergunning.

E fenomeno di e ultimo añanan aki tabata cu den hopi bario popular, no obstante ta existi e ley ROP (ordenamento teritorial) ta cu hopi hende ta coba den terenonan priva, causando molester na e otro habitantenan den barionan unda no por desaroya actividad industrial.

El a señala cu hopi compania no ta conciente di esaki ni di e ley di ROP.

E dignatario a expresa cu di otro banda mester tin un balansa pasobra Aruba tin construccionnan grandi ta andando, y constantemente nos pais ta desaroyando y mester di santo, granite, etc.

Pues, mester tin un balansa entre e desaroyo di nos economia y construccion, pero di otro banda cu e habitantenan por biba trankil den nan cas.

Tocante esaki e mandatario a anuncia un maneho cual esencia ta cu e Task Force cu a keda institui un par di luna pasa lo bay haci un inventarizacion di e actividadnan cu mester di un “hindervergunning”, ya cu gobierno a constata cu tin varios compania cu no tin esaki y esnan cu no tin permiso lo wordo informa tocante esaki y lo wordo informa riba ROP.

Gobierno ta bay haci tur su esfuerzo pa e actividadnan menciona lo wordo movi pa otro lugarnan cu no ta habita. Esaki den un periodo di dos aña.

Tin algun compania cu a indica caba cu nan ta bay muda na e zonanan industrial, y Minister di Infrastructura ta habri pa peticionnan, pa wak si tin lugar unda por otorga parcelanan na e persona of companianan concerni, pa nan muda.

E dignatario a subraya cu lo por haci excepcion y duna permiso a base temporal na e companianan aki den un fase di dos aña pa poco, poco nan bay na areanan cu no ta habita.

Minister Bikker a expresa cu esaki ta e balansa cu gobierno ta bay yega na dje pa nos economia tambe sigui draai, y cu e ta compronde tur dos banda di e medaya, tanto di e personanan cu ta haya molester cu pa 4 or di madruga truck ta cuminza core dilanti nan cas, santo ta bin den cura di nan cas, etc. Y di otro banda e doñonan di e companianan cu ta contribuyendo cu Aruba su economia, cu stof, santo, granite, etc., pa construccion di edificio.

Pa e companianan cu a base di excepcion por bin na remarca tin si, cierto rekisitonan manera orarionan cu no mag di opera, si ta camindanan di santo cu nan tin cu pasa riba dje, mester wordo asfalta, y tambe pa habri camindanan di acceso cu no tin molester pa e habitantenan. Esaki ta solucionnan practico pa evita molester.

- Advertisement -

DUNA COMENTARIO

Please enter your comment!
Please enter your name here