Segun Rene Bernabela
ORANJESTAD (AAN): E “falta di cooperacion” cu ta existi actualmente entre sindicato TOPA y DRH ta uno bisto, caminda cu presidente di e sindicato, Rene Bernabela a yama un conferencia di prensa, pa asina e pone riba mesa, di e casonan cu tin pega na e departamento y tambe e caminda di crus cu e mester a cana, y cu ainda ta canando pa loke ta e posicion huridico di su miembronan.
Bernabela a splica cu Sindicato TOPA tabata tin un reunion cu prome minister, dia 26 di Juli ultimo, caminda cu den e reunion aki, nan a toca dos tema. E prome tema cu a toca tabata e asunto di Gelijkbedrag, e bashipremie y e di dos tema cu nan a toca tabata riba e parti di cooperacion entre DRH y sindicato TOPA, pa loke ta suministro di informacion di e miembronan di TOPA. Ora cu a yega na e parti di cooperacion, ta caminda cu TOPA a duna di conoce na prome minister cu tin un situacion hopi penoso cu ta tumando luga for di comienso di e aña aki.
Si wak bon, practicamente for di basta tempo, cuminsando for di aña pasa. Durante e gobierno anterior, tabata asina cu TOPA tabata manda carta, unda cu tabata pidi e cooperacion di parti di DRH pa por haya informacion pa loke ta toca su miembronan, loke ta nan posicion huridico, caminda TOPA tabata manda carta pa pidi un reunion pa por haya informacion.
Hopi biaha casonan caminda cu ta presenta cu ta toca miembronan di TOPA, ta casonan cu tin di haci cu casonan di corte. Ora cu e casonan aki keda presenta, y ora haya resultado di corte, esakinan tin cu bay bek na e departamento di Recurso Humano. Nan no ta wordo procesa y TOPA tin prueba di esey, cual nan a presenta na prensa.
Despues di a sinta cu Prome Minister den e reunion, a dicidi e ora eynan, hunto cu bureau di prome minister, pa forma un comision caminda cu a dicidi e ora eynan cu no ta bon pa forma un comision, pa bay sinta hunto cu DRH pa por bay yega na e ora ey si por bin un miho cooperacion entre e DRH y sindicato TOPA, pa loke ta e suministro di informacion riba e miembronan di TOPA.
Kico a pasa
TOPA ta mira un reaccion di parti di DRH ta sali den un encuentro cu e tabata tin cu prensa, caminda cu e ta duna di conoce cu sindicato TOPA a bay keha na prome minister riba casonan caminda nan no ta haya atencion. Esey Bernabela a bisa corectamente, pasobra esey mes ta e caso. TOPA ta bisa con por ta posibel, caminda sindicato TOPA, for di dia 14 di Maart a manda un carta pa departamento di Recurso Humano, unda cu nan a solicita un reunion, pa por haya informacion tocante di su miembronan, riba nan situacion.
TOPA no a haya contesta bek di DRH. No a para aki. A manda un di dos carta, fecha dia 29 di Maart, caminda cu nan a spera di wordo yama como sindicato pa por trece nan inkietud, nan problemanan na atencion di DRH. Esaki tampoco no a haya reaccion di nan.
Bernabela ta puntra e directora di DRH, sra. Lares, kico e kier pa e sindicato haci. Si nan bay over na e lista, caminda cu por menciona cuanto persona ta pega cu nan posicion huridico na e momentonan aki cu no ta ni bay dilanti ni bin patras, pa loke ta nan stukken. E sindicalista ta cuestiona ta cerca ken tin cu bay. Si e directora di DRH no sa di invita sindicato TOPA pa bin sinta y pa tin un cooperacion pa por atende e problema di e miembronan di TOPA, e minister encarga cu e departamento aki, ta e prome minister. Ta cerca dje tin cu bay pasobra no ta hayando atencion di DRH.
E tipo di problemanan cu ta bin ta confrontando cun’e, cu no ta saliendo for di e edificio di DRH ta lo siguiente.
Tin problemanan di por ehempel personanan cu prome cu nan a baha cu pensioen, nan a sigui nan curso y termina esaki y a wordo priminti cu nan lo haya un aumento en schaal.
E personanan aki a kita bay, nan a baha bay cu pensioen, pero ainda e personanan aki di loke nan mester a haya prome cu nan a baha bay cu pensioen, nan no a wordo promovi y ya caba ta gosando di nan pensioen.
Ora cu a kere sigur esey ta unico caso, tin un total di 4 pa 5 caso, di hendenan cu hasta corte a bay pa bringa nan caso, e parti mas increibel cu no ta compronde ta cu despues cu a wak cu no a haya reaccion di DRH, a acudi na corte pa señala e problematicanan aki na hues. Hues di su banda a duna e ambtenaar rason riba esaki.
Ora cu hues a duna su veredicto cu e ambtenaar tin rason, cu DRH mester procesa pa dun’e loke e tin derecho riba dje ainda DRH no kier ehecuta e decision di hues.
Awo ta puntra DRH, ta cerca ken TOPA tin cu bay e ora ey. Ora cu a kere cu ta sigur un caso ta papia di dje, tin diferente veredicto caminda cu ta bisa cu via di esaki cu hues a dicta na fabor di e ambtenaar, ainda DRH no ta ehecuta e veredictonan aki. Si awo a para bira cu DRH ta para riba ley.
No por ta asina cu hues ta dicta na fabor di e ambtenaar, pero asina mes no tin ehecusion di e departamento aki.
