Home Gobierno Trabaonan intensivo tumando lugar pa drecha e camindanan cu pa añanan ta...

Trabaonan intensivo tumando lugar pa drecha e camindanan cu pa añanan ta den mal estado

18
0
SHARE
- Advertisement -

Minister Otmar Oduber:

ORANJESTAD (AAN) – Den conferencia semanal di prensa di Dialuna, Minister di Infrastructura y Medio Ambiente, Otmar Oduber, a duna informacion tocante e network di camindanan den nos pais, cu a capta basta atencion di comunidad.

Esaki mirando cu e gobierno aki, despues di basta aña, ta pone atencion un biaha mas riba e condicion di nos camindanan, caretera y boulevardnan.

E mandatario ta considera cu anteriormente tabata poco e atencion cu a wordo brinda, fuera di e dos proyectonan grandi PPP, esta Green Corridor y Watty Vos Boulevard.

Manera ta conoci Green Corridor a wordo entrega na gobierno, oficialmente, siman pasa, despues di un retraso di mas of menos un aña.

Esaki a ocasiona diferente debate y discusion den Parlamento, e dignatario a menciona, señalando cu esaki, na cierto momento, a pone hopi presion riba e proyecto, pa cumpli cu e contrato manera e tabata. Na e momentonan ey tabata tin mas of menos 500 punto di discusion di cual na e  momentonan aki por papia di como 40 cu ainda ta den discusion y cu a causa un boet di mey miyon florin riba e compania pa e incumplimento, y cu naturalmente nan tin cu caba di cumpli cu nan.

E mandatario a señala cu banda di esaki poco atencion a wordo duna na e infrastructura di caminda riba nos isla, y cu nan ta den hopi mal estado. No solamente tin un deficit di cas rond di Aruba, pero den tur bario a keda cu e problema di camindanan di tera, di stof cu ta molestia nos hendenan, unda hopi ta biba cera den cas door di e stof cu ta wordo lanta, mirando cu na Aruba tin masha poco yobida loke ta contribui na esaki.

Hasta den camindanan principal cu pa hopi aña ta existi, mas y mas por tuma nota di tur e buraconan cu ta wordo crea pasobra no tabata tin un plan di mantenimento y reconstruccion di nos camindanan, durante e ultimo añanan.

DOW ta calcula cu tin un deficit di alrededor di 300 miyon florin cu lo mester tin disponible pa por atende cu e problema di nos camindanan.

Na momentonan aki a pone un fondo disponible pa por cuminza atende, na prome lugar cu esnan cu ta sufri pa mas di 20 pa 30 aña cu camindanan di tera sumamente den mal condicion.

Minister Otmar Oduber a subraya cu esaki ta locual por mira cu ta e trabao cu DOW ta eherciendo na e momentonan aki.

E mandatario a reitera cu e condicion di nos careteranan merece di atencion y pesey el a pidi DOW hunto cu e companianan, experto y ingenieronan pa prepara un plan pa nan por bay trata esaki cu Parlamento, y mira kico ta bay haci pa futuro.

“Pone disponible seis, siete, ocho miyon pa aña sin cu bo tin un plan integral sin atende e problema di e camindanan aki na Aruba, ta mescos cu hiba awa pa lama. Bo ta drecha caminda, bo ta prepara un pida tera, cualkier renovacion di un caretera di 500 pa 700 meter, ta costa bo entre 700 cu un miyon florin. Por imagina cu si tin disponible un suma di siete of ocho miyon florin disponible, ta cuanto caminda bo por drecha? Y si mira e condicion di nos camindanan sin menciona e deficit enorme cu tin den pueblo, cu a sufri e ultimo 20 pa 30 añanan pasobra no a pone camindanan di asfalt, pero a djis drecha cada bez caminda di tera cu door di un tiki awacero y un tiki maestar di tempo, ya caba e camindanan aki ta bira den hopi mal condicion”, segun e mandatario.

Banda di esey, Minister Oduber a agrega, e negligencia cu tabata tin durante e ultimo añanan pa percura di drecha y mantene e camindanan cu ta wordo transita diariamente na un forma frecuente, tambe a crea un problema extra.

E dignatario a indica cu tin hopi keho tocante e buraconan riba caminda y si mira cuanto enberdad tin, ta surgi e pregunta si no tabata prioridad pa pone atencion riba e camindanan aki envez di a inverti den e proyectonan PPP na e forma cu a wordo haci, durante e ultimo añanan.

Esaki ta un discusion cu lo wordo hiba den Parlamento. Lo mester presenta un plan macro na corto, mediano y largo plazo pa atende cu e situacion aki cu ta un dolor cu ta biba den nos comunidad fuertemente.

Minister Oduber a pidi pueblo un tiki pasenshi pasobra na e momentonan aki ta trahando pa drecha caminda y traha caminda nobo, apesar di e fondonan limita, den e diferente areanan concerni, di nos Isla.

- Advertisement -

DUNA COMENTARIO

Please enter your comment!
Please enter your name here