Home Gobierno Utilities a haya email di WEB pa pone atencion riba aumento prijs...

Utilities a haya email di WEB pa pone atencion riba aumento prijs di crudo mundialmente

75
0
SHARE
- Advertisement -

Prome Minister mes no a haya peticion:

ORANJESTAD (AAN) — Prome Minister sra. mr. Evelyn Wever-Croes den conferencia di prensa Diahuebs, a cuestiona un publicacion den media tocante un peticion cu WEB lo a haci na gobierno pa incrementa e tarifa di awa y coriente mirando e aumento di prijs crudo riba mercado mundial.

E mandatario a coregi esaki no obstante a constata cu WEB a manda un email pa Utilities pidiendo su atencion riba e aumento di prijs di crudo mundialmente.

Den contacto cu sr. Oduber, Director di WEB Aruba NV, el a bise cu Diaranzon atardi nan a manda un email pa e director di Utilities y e ta kere cu esaki a cay den man di hende cu ta specula cune, talvez. Y a bise tambe cu e cifranan cu ta aparece den e publicacion no ta corecto.

En todo caso e mandatario no conoce e contenido di e carta, segun el a señala.

E mandatario a considera esaki un publicacion eroneo y a declara cu ningun momento so a presenta un proposicion na gobierno pa aumenta tarifa di awa y coriente.

Esaki no ta kita cu gobierno ta observa e desaroyonan internacional riba tereno di prijs di combustible, pero a duna Utilities instruccion, como e compania cu ta atende e tema aki, pa baha prijs y no pa hise.

E mandatario a splica cu riba peticion di prensa mes, el a busca informacion ya cu el a wordo anticipa cu e pregunta ta bay bin den e rueda di prensa y el a bin compronde cu WEB a manda un email pa Utilities den cual e ta pidie atencion pa cu e aumento mundial riba prijs di crudo.

E mandatario a indica cu e email a wordo manda direct pa Utilities y su board no a haye prome cu e noticia a wordo divulga den corant.

Prome Minister a subraya cu no ta prome biaha cue ta papia riba e gastonan di WEB.

Mas di un bez a bin na mesa cu e gastonan di WEB ta halto. Prijs di crudo a aumenta, y no manera tempo cu gobierno anterior tabata na mando cu na cierto momento e prijs a baha di riba 100 dollar pa hasta 40 dollar pa bari, e dignatario a acentua.

Aworaki e prijs di crudo a subi di 70 dollar pa bari bayendo pa 80 riba mercado mundial y gobierno tin cu atende cu esaki “Y WEB a pidi nos atencion pe”!

“Nos contesta como gobierno tabata cu WEB tin cu baha gasto. Esey no ta conta pa WEB so, pero specialmente pa Utilities. E ta mesun señal cu nos a manda pa ELMAR por cierto, y mesun mensahe cu nos a manda pa tur compania estatal. Baha gasto prome, busca otro alternativa y despues boso ta bin na Gobierno y nan ta bezig cune”, Prome Minister a declara.

E mandatario por a compronde di Utilities cu ningun momento nan a haya e necesidad pa bati na porta di gobierno y pesey gobierno no ta involucra den esaki.

El a reitera cu hunto cu WEB nan ta bezig ta wak ki otro alternativa tin pa baha e gastonan di e compania prome cu yega na bati na porta di gobierno.

“Loke mi kier ta asegura comunidad cu nos como gobierno ta trahando dia y anochi cu tur e retonan aki cu nos a bin encontra, financiero, economico, social, riba mercado internacional, cu nos pais bisiña Venezuela y cu e prijs di crudo ta subi. Pero dia aden dia afo loke nos ta haci ta pa e retonan aki no bira un problema pa comunidad, pa e ciudadano aki na Aruba cu ya caba ta pasando den momentonan dificil”, e mandatario a declara.

Prome Minister a expresa cu e ta lamenta cu e publicacion a sali asina y a bisa cu e ta compronde for di unda a bin, pero riba su mes no por stroba ora cu tin divulgacion cu ta sembra un poco di panico.

E mandatario a agrega cu segun loke el a compronde di e publicacion WEB ta bisa cu mirando e solucion cu tin cu bin pa e problema di ASTEC mester hisa prijs di awa y coriente pa pueblo. Aki, el a bisa, e tabata bastante enfatico cu e gastonan adicional cu ta bin pa soluciona e problema di molester cu e trahadornan di e compania ey ta sinti, no ta wordo carga door di WEB so, ni di e ciudadano cu tin cu paga awa y coriente, pero ta wordo reparti door di tur e stakeholders. Lo bay mira ken ta esnan responsable, ken ta esnan cu no a haci e trabao debidamente ora a cera un contrato di 25 aña pa opera e waf, ken no a haci e trabao debi ora cu a dicidi di bay muda pa Barcadera. Pero no ta asina cu e ta bay pone riba e cuenta di e ciudadano.

 

 

 

- Advertisement -

DUNA COMENTARIO

Please enter your comment!
Please enter your name here