Home General Abuso di droga no conoce edad

Abuso di droga no conoce edad

67
0
SHARE
- Advertisement -

En busca di splicacion pa aumento conducta agresivo

*Aumento drastico di uzo di droga cerca poblacion 40+

*WHO: marihuana ta keda entrada pa droga pisa

Sucesonan dramatico cu ta causa consternacion mundial, a aumenta. Continuamente ta registra casonan di comportacion straño. Hende ta parce di a bira mas cruel y agresivo.

E relatonan di World Health Organization no ta sconde e berdad mundial. Abuso di droga no conoce edad mas. Loke tabata ser considera un problema di hobennan, awe ta afecta,  na un forma creciente e generacion cu a cumpli cuarenta aña. Un relato di DIARIO pa aporta na e buskeda di problemanan social actual, cu ta genera na su turno uzo di droga.

Marihuana ta keda e trampolin pa droga mas pisa cerca hobennan cu ainda ta mucha.

ORANJESTAD (AAN) —Motibonan social economico, problemanan di bida, pobreza y falta di oportunidad ta keda e spiraal cerca hobennan cu ta cay den gara di droga. Hopi di nan no a cumpli 15 aña pero tin problema pa confronta e realidad di bida.

Marihuana hopi bes ta e entrada pa abuso di droga mas pisa cerca hobennan cu asina ta drenta un circulo vicioso.

Nan ta bira victima di traficantenan den droga cu den e produccion y benta di droga por conta cu e hobennan cu ta haya un forma di gana placa.

Nan ta bay forma parti di gang y si mester enfrenta polis nan ta enfrenta autoridad.

Problema di e comunidad hoben ta conoci aunke no atendi a pesar di e guia cu World Health Organization (WHO) ta brinda. Loke ta sorprende ta e informacion tocante e grupo creciente di adicto na droga cu a pasa cuarenta aña di edad.

E PROME GENERACION DI DROGA A KEDA FIEL 

Informacion cu e organisacion mundial di salu ta dispone di dje y ta presenta den su relato 2018, ta depende hopi di e situacion na paisnan Occidental, cu ta compila informacionnan.

Tin cultura caminda diferente tipo di droga ta acepta y ta parti di bida normal.

Paisnan Occidental ta topa awor cu personanan cu a drenta den contacto cu droga importa di otro culturanan durante nan hubentud y a keda adicto na cierto tipo di droga.

Naci despues di guera te aña 1964, nan ta conoci como Baby Boomers, cu ta e temporada durante cual hopi baby a nace, a crece den e tempo cu droga a haci su entrada na paisnan Occidental.

Awor e desaroyo tin refleho den e cifranan di edad di uzado di droga.

Nan adiccion na droga ta visibel den e resultadonan di uzadonan di productonan deriva di opium na paisnan Occidental.

E cantidad di adicto di e producto aki y cu ta busca tratamento, a baha. Pero cifranan di uzadonan den nan limitenan di edad, a subi.

Si na 2006 un di cada cinco persona registra como uzado di un producto deriva di opium a pasa 40 aña, na 2013 un di cada tres uzado, tin mas cu 40 aña di edad.

Morto debi na un overdosis di e tiponan di droga menciona, a baha generalmente. Pero den e grupo di edad aki, nan a subi.

RESULTADO EPIDEMIA DI HEROINA A BIRA VISIBEL 

Uzo di heroina pa medio di inyeccion, tabata popular cerca adictonan na droga mas pisa durante añanan 80 y 90. Den e periodo aki a papia di un epidemia,  manera World Health Organization ta trece dilanti.

Prome cu nan tabata tin otro categoria di uzado di droga, pero e organisacion mundial ta constata poco atencion pa e problemanan di adictonan anciano.

Un investigacion a ser haci na paisnan Europeo pero no a topa cu strategianan special pa atende cu e problema aki.

Mientrastanto e grupo aki ta aporta na un crecemento di e cifra di morto causa pa droga, cu a subi cu sesenta porciento di 2000 pa 2015.

Personanan riba 50 aña a representa 39 porciento di e grupo cu a muri dor di abuso di droga na 2015. Na 2000 e tabata 27 porciento.

Productonan deriva di opium ta e tipo di droga cu mas a ser uza cerca e grupo di adicto riba 50 aña di edad.

Amphetamine  y cocaina a percura pa seis porciento cada uno na e cifra di morto den e grupo aki.  E resto, cu ta 13 porciento, ta adicto na otro tipo di droga.

Cu cambionan den comunidad, mester busca contesta pa problemanan nobo.

MARIHUANA TA KEDA ENTRADA PA DROGA PISA 

E informacionnan di WHO ta mustra diferencia di e tipo di droga cu ta ser uza dor di diferente edad pero tambe diferente cultura.

Opium ta un droga cu ta ser uza como parti di cierto culturanan. Na e paisnan aki por nota cu tradicion ta hunga un papel y hobennan tambe tin e tendencia pa uza productonan deriva di opium.

Na paisnan Occidental por nota cu hobennan ta cambia mas den e variedad di droga. Personanan di edad mas halto no ta interesa den e tipo di droga moderno, cu tin hopi impacto cerca hobennan.

Cifranan di e droga ecstacy ta indica cu e tipo di droga aki ta popular cerca hobennan mientras cocaina ta keda e droga cu demanda internacional pa temponan largo.
E cifranan pa uzo di marihuana ta mustra cu Cannabis ta entrada pa e mundo di droga mas pisa cerca e poblacion mas hoben na nivel internacional.

Den e rapport ta bin dilanti cu cientificamente ta proba cu hobennan cu uza marihuana prome cu nan cumpli 16 aña, tin mas chens pa bira adicto na droga of haya problema mental. Depresion ta menciona como un posibel resultado di marihuana.

E rapportnan di World Health Organization ta contene informacionnan cu ta duna un bista na uzo di productonan cu ta influencia comportacion humano.

E ta indica tambe cu tin un circulo vicioso notabel riba e tereno di uzo di droga y e base di comunidad.

- Advertisement -

DUNA COMENTARIO

Please enter your comment!
Please enter your name here