ORANJESTAD (AAN): Riba Diabierna merdia, un unidad di Polis moviendo cu sirena riba e railnan di tram den Caya Betico Croes na Playa, a haye envolvi den accident. E momento ey, e patruya di Polis tabata na caminda pa asistencia den caya.
A resulta cu chauffeur di un Dodge Dakota Pickup color blanco cu number A-2190 a yega na e cruzada di Caya Betico Croes y Oude Schoolstraat, y no a ripara cu Polis tabata yegando cu sirena y zwaailicht.
Consecuencia ta cu el a subi e caminda, y asina nan dos a dal den otro.
Bon mes cu no tabatin ningun herido. E unidad di Polis, cu ta un Toyota Prado cu number D-137, no por a sigui mas pa e asistencia, y ta otro Polis mester a bay check esey.
Como cu ta trata di un accident unda un vehiculo policial ta envolvi, a manda Specialista di Trafico di Polis pa investiga e accident. Pa algun momento, Tram no por a sigui pasa den caya, debi cu e accident aki a blokea caminda.
