Home Parlamento Aruba ta riba caminda for di un ATA Bank pa un Serlimar...

Aruba ta riba caminda for di un ATA Bank pa un Serlimar Bank

51
0
SHARE
- Advertisement -

Parlamentario Arthur Dowers

ORANJESTAD (AAN): Parlamentario Arthur Dowers a mustra cu Aruba ta riba caminda for di un ATA Bank pa un Serlimar Bank, ya cu practicamente den tur reunion cu minister di infrastructura a atende na Parlamanto te cu awo, el a bin pa pidi y haya mas placa.

Dowers a mustra cu tur reunion cu minister Oduber a atende el a logra di manipula fraccion di MEP di tal forma te cu nan ta traha mocionnan pa asina e haya mas placa pa por sigui cu su campañanan priva cu el a bin ta hibando.

“E minister aki semper a traha asina, semper buscando formulanan pa e por haya mas placa pa haci su cosnan y tin un dicho cu ta bisa, ‘een vos verlies zijn haren maar niet zijn streken,’ y e minister aki ta sigui bin cu su trikinan den parlamento pa e haya aprobacion pa mas placa.

Hasta un ex miembro di parlamento y ex minister  a publica algun dia atras informacion riba e forma con minister Oduber a bin ta manipulando su ex partido MEP, ya cu e formulanan aki ta bon conoci pa tur hende.

Si tuma na cuenta cu e minister aki a trece un set di contract y duna esaki pa conocemento di parlamento, pero e contractnan mas fundamental  e no a trece y a plannan mas fundamental e no a trece esakinan pa parlamento.

Minister Oduber no a trece un plan di maneho di Serlimar cu ta mustra unda Serlimar ta awe y unda Serlimar ta bayendo.

Si tur hende tuma na cuenta con minister Oduber en realidad no ta e persona cu tin responsabilidad di maneho di Serlimar, si e ta responsabel pa Serlimar como minister, pero Serlimar ta un organisacion ‘sui generis’ cu su mes un board, caminda e board aki ta responsabel pa e maneho basa riba e punta di salida di gobierno pa percura pa tin un maneho.

Den parlamento nos no a mira un presentacion di un liña di maneho di e gruponan aki simplemente loke nos por a mira tabata  plan di minister Otmar Oduber su manera con pa saca placa for di turismo, con pa saca placa for di pueblo, pa e por garantisa pa e sigui cu su racha di faboritismo pa cierto hendenan.

Un miembro di fraccion di MEP a haya e curashi di atende minister Oduber riba e contract cu el a ofrece na parlamento caminda c’un stem masha abou el a bisa e minister cu ta masha straño cu parlamento  a haya un service contract cu ta bisa cu ta bay paga 372 mil florin pa pone tubo pero nigun caminda ta specifica con largo y con diki esakinan ta.

Minister Oduber su contesta tabata cu tur hende sa con diki y con largo e tubonan aki ta y esey ta e cos di mas ridiculo mi a yega di scucha den mi bida y un contract di mas estupido cu mi a yega di mira.

Cu e minister ta traha un contract caminda nan por pone un tubo di un milimeter of di 10 centimeter pero ningun caminda e ta para den e contract y su presenta un disputa cu kico lo bay bringa esaki den Corte, ya cu ta pone cu si tin disputa por bay Corte pero cu kico gobierno por bay Corte si ningun caminda a specifica e obligacion di e contratista.

Ki palabracion a wordo haci cu e compania y aki tin cu mustra cu e compania aki ta uno cu ta amigo di minister.

Ora cu bay analisa e contract, e meneer aki ta duna un prijs pa coba buraco pa dera sushi na Seroe Thijshi y logico lo ta cu si ta bay coba un buraco ta pone den c contract cu ta bay coba un boraco di tanto meter pa tanto meter y e lo cobra un suma pa esaki.

Awor tin un compania eynan cu ta cobando un buraco cobrando algo mas cu 200 florin pa ora, pero kende ta sigura cu e meneer aki ta coba buraco ocho ora largo? Ken of na unda ta pone cu mester coba boraco ocho ora pa dia?

Pues ta e cosnan aki, ta contractnan sumamente ridiculo  y ora cu mira ta kende tin e contractnan aki, bo ta compronde mesora di con e minister aki mester haci tur loke e ta haciendo aworaki, castigando nos pueblo pa percura pa e por haya placa pa e sigui cu e tipo di cosnan aki cu mi persona ta considera bagamunderia.

E contractnan aki wel is waar ta wordo firma pa hendenan cu e minister a pone handpick den Serlimar pero tur contract ta wordo cera den opdracht di e minister,” Parlamentario Arthur Dowers a declara.

 

 

 

- Advertisement -

DUNA COMENTARIO

Please enter your comment!
Please enter your name here