Home Deporte ASU no tabata y no ta den proceso pa adkeri ningun tipo...

ASU no tabata y no ta den proceso pa adkeri ningun tipo di propiedad of facilidad deportivo

58
0
SHARE
- Advertisement -

Segun Gerald Franca, presidente di ASU

ORANJESTAD (AAN)- For di Sr. Gerald Franca, presidente di ASU, Diario a haya e siguiente comunicado.

“ Recientemente mi a tuma nota di un declaracion di Minister di Deporte cu Fundacion Facilidadnan Deportivo (FFD) supuestamente lo kier traspasa facilidadnan deportivo pa Aruba Sport Unie (ASU). Pa motibo cu e declaracion aki a cuminsa biba un bida riba su mes, mi a dicidi pa duna e siguiente aclaracion.

ASU no tabata y no ta den proceso pa adkeri ningun tipo di propiedad y/of facilidad deportivo. Al contrario, den ultimo añanan ASU a traspasa un di su facilidadnan deportivo, Joe Laveist Ball Park (JLBP), pa FFD y a keda solamente cu Centro Deportivo Libertador Betico Croes (CDBC) como su cede. Mester menciona compleho Deportivo Guillermo Prospero Trinidad tambe cual a cede na Lotto pa Deporte como garantia pa e inversion den renobacion di e stadion, CDBC a wordo traspasa pa ASU door di Gobierno y JLBP door di LAGO.

Aruba Sport Unie a wordo funda na aña 1941 como un organo deportivo general cu ta consisti di e diferente federacion nan Deportivo di Aruba. E meta di ASU ta pa promove y facilita deporte na Aruba. Actualmente ASU ta wordo forma exclusivamente door di 35 Federacion Deportivo Arubano y e Directiva di ASU ta wordo eligi door di e Federacion nan afilia segun e proceduranan cu su Statuut ta stipula. Ta bon pa subraya cu ASU ta un organo deportivo autonomo, pa cual motibo, nunca den pasado y actualmente, ni Idefre, Ibisa, Gobierno o Lotto pa Deporte tin representacion den e Directiva di ASU. Conforme Statuut di ASU ta e asamblea o reunion general ta e organo mas halto di ASU.

Mantencion di e propiedadnan y otro gastonan di operacion di ASU ta wordo subsidia principalmente door di Gobierno. Lotto Pa Deporte tambe a yuda den e mantencion y inversion. E Federacionnan afilia ta paga un contribucion di Aw 150,00 pa aña.

Ta bon pa tuma nota tambe cu, segun e statutonan di FFD, un traspaso di propiedad pa cualquier otro entidad of persona, ta rekeri aprobacion unanime di e Directiva di FFD cu ta consisti di representante di Minister, representante di Lotto pa Deporte y representante di ASU.

Pa e motibonan menciona anteriormente, mi ta lamenta e declaracion di minister comokiera cu e Minister di Turismo, Salubridad y Deporte a basa su mes riba un rumor infunda e incorecto. Ta un lastima cu ningun di e conseheronan di e minister no averigua y/o asegura nan mes debidamente di un que otro pa evita cu declaracionnan tendencioso ta daña e imagen di minister y di deporte na Aruba.

Semper ASU a hasi un esfuerzo enorme pa mantene un posicion autonomo y neutral pasobra ta conoci y proba mundialmente y localmente, cu una vez cu politica mete cu deporte por lo general ta daño so ta wordu causa na deporte. Criticanan constructivo ta welcome den Deporte y ta yuda motiva pa haya conciudadanonan capacita y cu no tin un agenda scondi o interesnan personal como meta dispuesto pa asumi responsabilidad den mundo deportivo. Esaki ta un motibo y razon sumamente importante.

Nos deseo y meta ta pa tur hende sin importa edad of unda nan ta biba riba e pida baranca aki tin e posibilidad pa hasi deporte cu e ta gusta.”

- Advertisement -

DUNA COMENTARIO

Please enter your comment!
Please enter your name here